財經評論：明星股市效應
■周子瑜「被承認」是中國人後，其經理人公司JYP股價一日跌逾半成。 資料圖片
咪以為娛樂新聞同財經大纜都扯唔埋，其實留意多啲都幾有趣。
唔知讀者們仲記唔記得，去年9月28日，日本男神福山雅治宣佈被「私有化」後，一班OL、大媽粉絲傷心到飯都唔煮之餘，其所屬事務所Amuse
股份亦捱唔住，翌日股價勁跌超過8%，收巿埋單計蒸發咗41億日圓。事實證明，男神結婚真係好大件事，有女粉絲更將此事命名為「福山䉪墰𠠬縇（福山Shock）」。
SMAP離合影響日股
再數到近日嘅新聞，有幾位娛樂人物亦接連成為焦點，最多人討論嘅，當然係無端端被「蝗安（黃安）」檢舉為台獨份子嘅韓國女團Twice台籍成員周子瑜。事後其經理人公司JYP安排周子瑜拍片道歉，更喺片中承認自己係「真．中國人」，結果被唔少網民抨擊，話JYP擺佢上枱。唔知係咪因為呢件事，上周五（15日）JYP喺韓國科斯達克交易所（KOSDAQ）嘅股價一日就跌超過半成。
而作為日本最強男子天團，SMAP嘅影響力亦一樣不容忽視。有留意開娛樂新聞嘅你都知，上星期SMAP突然宣佈拆夥，有網民講笑咁講，呢個消息嚇到各地歌迷「心都離一離」不特止，就連第二日（14日）日經指數都陪跌近500點收場。咁啱，SMAP周一晚開記者會，向大眾道歉兼宣佈合體，可能係股民條氣順咗，翌日日經指數又真係升番逾百點，真係好巧合！
講開又講，作為一個時刻留意財經界消息嘅記者，當然留意到最近先出現嘅「祥指」，呢個指數真係趣味十足，就連身邊不諳投資的朋友都時刻留意其跌勢。是咁的，台灣藝人羅志祥上周喺北京出席活動，期間被問到與中國明星合作嘅感想，佢講咗句：「不用分那麼細，因為我們都是中國人！」
結果如何？當然令唔少港台歌迷失望啦，更引發其facebook「走fans潮」，秒秒鐘真係有幾十、甚至幾百個like跌幅㗎！有網民更貼心地製作咗一個「祥指即時報價系統」，方便各位隨時查看盤中形勢。短短幾日祥指已經跌咗4、5萬個like，截至今日仲有236萬幾個！
所以話，財經未必真係又悶又難，只要多留意嚇身邊嘅事，甚至係娛樂資訊，可能都發掘到有趣嘅新聞！
記者：江靖然
財經評論 舊文
來源 source: http://hk.apple.nextmedia.com