匯海翻波股難玩
2016年01月12日
內地叫停熔斷機制，仍然無阻中港股市跌勢。由於人民幣貶值預期形成，推高本地人民幣拆息，甚有狙擊與反狙擊意味，在匯價激盪下，港股受到波及，如果唔係諗住買股擺佢一年半載，好多人都唔敢入市住。
上星期美股低收，港股在美國ADR預託證券已跌穿兩萬點，
結果一開就無運行，指數插穿心理關口，市場災味甚濃。
恒指插穿兩萬點後，低位一度有買盤承接，令大市短暫重上兩萬關以上，午後上證指數以全日最低位收市，報3016點，下跌169點，跌幅5.3%，創近四個月新低。深證成份指數亦以全日最低位收市，報10212點，下挫676點，港股最終挨近全日低位收市，恒生指數收報19888點，急挫565點；國企指數收報8505點，插340點，成交金額875億元。
人仔挾完拆息又托價
由於擔心人民幣貶值喺跌市震央，內地資產用港元計價勢必受壓，之前喺跌市表現硬淨的內房股沽壓顯著。中海外(688) 造22.6元，跌4.8%；華潤置地(1109) 插夠6.2%，造18.68元；萬科(2202) 仲慘烈，成為包尾國企指數成份股，造17.62元，挫足10.7%。
股市大插之餘，人民幣市場同拆息都好波動。人民幣隔夜拆息再創紀錄高位，於下午3時45分抽升至22厘。渣打銀行高級利率策略師劉潔話，當前離岸人民幣流動性再次收緊，主要受離岸人民幣即期市場疑似干預的影響。
傍晚離岸人民幣仲突然轉強，美元兌人民幣突抽升，一度高見6.6164，大幅升值667點子，不排除阿爺見個勢咁又出手。
人民幣拆息急升，相信同離岸人民幣供應減少有關，與此同時，內地限制資金流出，令離岸、在岸價拉距拉大，相信都令拆息會變得緊張，喺呢個狀況下，實際上會增加投機者借入並做空人民幣的交易成本。
喺98年亞洲金融風暴時，大鱷沽空港元，特區政府官員企硬挾高息口，意圖增加投機者成本，但此舉令銀行同企業都好傷，股市跌得仲急，大鱷喺股市沽空執大水。依家人民幣離岸、在岸兩個市場唔同，香港拆息扯高，理論上唔會直接影響內地，但最後效果仍要觀察。另一點係港元情況，由於呢排港匯稍為轉弱，市場開始關注停泊喺本地的資金係咪會流走。
呢排市場人士理論多多，講到風聲鶴唳，陸羽仁睇得簡單啲，覺得呢浸跌市都係大鱷搵食動作。外資睇淡中國股市差唔多已經兩年，無奈阿爺一直力托，此輩苦無良策食胡，直至去年人民幣匯改兼入國基會貨幣籃子，匯價要跌，市場波動，咁大鱷就搵到位入，插低人民幣兌美元離岸匯價。在匯海翻波下，股市自然好難企穩啦。
造淡搵銀唔會咁快完
大鱷基本上唔係咁睇好內地短期經濟表現，有機會自然造淡搵銀。佢地早排喺高位累積淡倉，估計數量唔會少。淡倉數量唔會細，唔可能好快平倉離場，加上依家客觀環境唔好，個勢對佢哋有利，試問點會咁快玩完。
睇番依家恒指雖然插破兩萬點，但好多股份同2013年跌穿兩萬點時比仲有唔少水位。基本上依家跌得殘的主要係舊經濟股，特別係三桶油，仲有地產、銀行，但科網股同概念股好似港交所(388) ，仲有唔少升幅，如果大鱷要搵食，想沽都仲有唔少空間。所以，依家風大浪大，買股最緊要有持貨力，諗住可以擺低唔理佢，先至出手未遲。
喺外資淡聲淡氣下，都仲有人唱唱反調。瑞銀證券H股策略分析師陸文傑在電話會議指出，港股大幅調整後，市場恐慌情緒高，惟對港股後市表現不悲觀，預料「深港通」開通後會利好番港股。
該行中國首席策略分析師高挺就看好可選消費、醫療保健、信息技術板塊，又認為要留意債券泡沫、人民幣貶值、國家隊退市風險。
陸羽仁
金融High Tea 舊文
來源 source: http://hdfin.stheadline.com