放水救唔到火
2016年01月22日
A股唔靚仔，港股周三大插750點後，彈一彈就無力，恒指碌番落萬九點樓下，再插344點。個別強勢股仲被人拋售，似乎淡友有逐隻狙擊的策略。
人行大力放水，推4000億元人民幣逆回購，創近3年單日最多，內地股市一度急升，點知係迴光返照，發揮唔到救火
作用，尾市跌得更急，全日挫逾3%收市。上證指數收報2880點，挫96點；深成指數報9975點，跌390點，內地護市乏力，搞到弱不禁風的港股午後再散，恒指全日收報18542點，跌344點，國指收報7835點，下滑179點或2.24%，創2009年3月以來新低，成交945億元。
潤啤一舖跌到夠
引人注目的是去年藍籌股王華潤啤酒(291) ，中午公佈營運數據後遭洗倉，股價暴跌，收造12.54元，插14%，為包尾藍籌股。啤酒係現金生意，加上之前外圍有啤酒股世紀併購，令到潤啤股價超硬。但佢收入主要係人民幣，點都有匯價影響，終於一下子俾人拉咗落馬。
我在網誌講到買股收息，但也有不少朋友估個市未跌完，仲有可能再插，認為買收息股唔使咁急入市。呢個講法家顯然係市場主流，大家睇淡好易見得到，首先係家有好多股仲係創緊新低；再者，喺家港匯仲未觸及7.85的兌換保證下限價，由於香港利息低過美國，正常資金係應該流走，所以遲早要觸及下限，故此港息總有一日要跟美國加息，即係話股市仲會再有一擊嚟緊。
雖然個市難言見底，但買股要睇大氣候，同時要睇自己口袋有幾深，如果錢多買少少股收息唔係壞，畢竟如果你成手現金，有100萬身家只得10萬蚊股票，90萬現金，無理由日日等博撈底。相反你得10萬現金，我就會叫你唔好郁住，即使有反彈，都未似一Q跌完。我同意呢啲市有災味，要預咗長期作戰。
家係當頭跌，股民心態係入市易輸難贏，買股都要預備捱價，準備長線持有。至於買甚麼股份，有人喜歡內銀、內房；有人喜歡港交所(388) ；亦有人喜歡買資產集中喺內地以外的股份，好似匯控(005) 同香港地產股。
喺股海亂世中，港交所發佈新公司標誌，同時詳釋新的三年戰略規劃。在香港及倫敦核心業務人手編制上，不會有太大增幅；但定息及貨幣產品、現貨大宗商品等剛起步的業務，需要增聘人手。
港交所加速下滑
港交所家市盈率36倍，息率2.45厘，如果收息唔算吸引。呢排佢喺跌市有加速下滑跡象，如果睇長線要兜底最好等等，如果等唔切都唔好一次買晒，因為如今呢種匯災市，跌起上來好難估，到跌勢再加急時，好似港交所呢種高市盈率可以跌得好快，反而一些低市盈率弱股仲無得再跌太多。
喺大家關注香港提早加息對本港地產股影響之際，大行法巴就發表報告，認為本港流動性仍然充裕，同時銀行同業拆息(Hibor)保持在極低水平，認為可趁股價弱勢吼本地地產股。
該行維持今年住宅樓價下跌10%及明年些微反彈3%睇法不變，並認為地產股每股資產淨值(NAV)已折讓達40%，等如過往多過下跌周期中估值的艱難情況，現時估值不貴。該行補充，預期豪宅及港島或九龍的樓價會跑贏。在地產股中，法巴行業首選長實(1113) 、新地(016) 及信置(083) ，主要係股份資產負債表強勁。喺呢三隻股份中，信置負債最低，差不多接近零水平，現時息率有5%。我自己睇地產股在急跌後有反彈空間，但我睇樓價無法巴咁牛，所以長揸就不選現價的地產股了。
陸羽仁
金融High Tea 舊文
來源 source: http://hdfin.stheadline.com