財經評論：大鱷的Big Short
■對沖基金經理被稱為大鱷，因其反應快、一擊即中、而且殘暴。 《沽注一擲》劇照
對沖基金經理被稱為大鱷，是取其反應快、一擊即中、而且殘暴，每每在大型金融危機時，對沖基金都能大賺一筆。
美資對沖基金Hayman Capital近來不停叫陣，創辦人巴斯（Kyle
Bass）沽清成個投資組合，集中85%火力造低港元人幣，聲稱沽空額達billions（數十億美元），是繼次按後最大的Big Short，原因是中國內銀體系瓜柴，香港未能倖免，兩地貨幣會貶到叔叔都不行。
大家或者會驚一驚，因為美國次按一役，巴斯旗下基金當年回報達212%，是他生涯佳作，連Michael Lewis本《Boomerang》都有提及。而早年他曾花3年時間沽空日圓，賺近3億美元；07年又沽希臘債，傳聞賺近數十億美元，實際上當年回報為16%。
不過，鱷魚並非次次都咁惡，天氣唔好嘅時候，鱷魚都要捱餓。巴斯去年曾致函投資者，提及Hayman Capital旗艦基金過去8年年均回報僅1.56%，前年基金近蝕錢收場，投資者不停贖回，而據美國媒體引述消息披露，去年巴斯的旗艦基金7月單月蝕11.69%，8月則收復部份失地。
除了順勢沽空牟利，鱷魚貪婪無恥，巴斯沾得上邊。話說去年他成立Coalition for Affordable Drugs，要求藥廠開放製藥專利，降低醫藥費做福人群，不禁令人覺得他善心滿瀉。後來被人發現，原來他short了藥廠股票，受千夫所指，他只施施然地回應：「專利權咪又係用嚟賺錢。」結果當然是輸錢收場，聲名狼藉。
亦須留意，Hayman Capital管理資產去年初僅剩15.6億美元（約120億港元），至今未有更新的數據披露，故他聲言已動用billions沽空港元人幣，確實成疑。
巴斯並沒有向銀行或任何機構借錢，除了借貸成本昂貴，百億元信貸銀行未必肯借，就算肯借，金管局一定敲爆你道門。實際上巴斯是利用隱式槓桿（Implicit Leverage），簡單啲講就是有用衍生工具沽空，故此他稱數十億美元子彈，並非完全實數。
呢個人睇落去咁流，點解危言聳聽，都要細心聆聽？以萬億元計資產back住嘅貨幣，幾十億美元彈藥當然難撼動，但好歹佢都係用真金白銀，不是坐在一旁叫陣，然後食花生的末日博士，因為輸起上嚟，巴斯真係可以返佢鄉下耕田。
記者：周家誠
財經評論 舊文
來源 source: http://hk.apple.nextmedia.com