中環在線 - 李華華 2016年2月16日
中環在線：過檔後撞正楊永仁財困
張華峰曾告誡林家亨
■張華峰（左）自爆曾叫過檔嘅林家亨萬事小心。
立法會議員兼恒豐證券老闆張華峰果然有先見之明，佢位舊夥計林家亨，舊年10月過檔恒發洋參（911）創辦人楊永仁私人嘅恒發證券，繼續做股評人，臨走前提醒過佢，點知半年唔夠，楊永仁真係陷入財困。
回巢「無所謂」
恒發洋參過年前股價暴瀉，楊永仁承認財困，押股後被斬倉，公司噚日亦公佈要賣過半數股權畀獨立第三方。至於恒發證券嘅下場，暫時就冇乜消息。
張華峰噚日跟傳媒午宴，被問到有冇聯絡泊錯碼頭嘅林家亨，佢回應話，「林家亨係好有經驗嘅行家，知道自己做緊乜」。
其實張華峰喺林家亨走之前，有告誡過佢，出去闖要萬事小心，話口未完就遇著新老闆財困。問張華峰歡唔歡迎林家亨回巢，佢就話「冇所謂」。
張華峰跟住忍唔住又要分析一下細價股點樣累散戶輸錢，指莊家喺高位未必散到貨，但由高位沽落一半，散戶已經覺得平，好似好抵，仆入去買，咁咪出事囉。
佢順便插證監會：「證監對我哋中小企就管到滴水不漏，對財技就冇方法。」
講完人哋，講番自己，今年立法會換屆，張華峰如果想連任金融服務界議員，應該係時候部署。張華峰認為，最緊要睇選民，即係業界覺得佢過去做唔做到嘢，幫唔幫到手，如果有人想挑戰佢，都係呢兩句要求。咁仲選唔選呢？佢賣關子話「未決定。」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com