智取大市 - 晉佳 2016年2月16日
智取大市：進口未見真恐慌
■市場最恐慌嘅畫面，相信係有一日進口數據不尋常爆升。 資料圖片
港股技術反彈，入市同唔入市都係賭單邊，暫不多提，反而值得留意中國1月出口同進口數據，按年分別下降6.6%及14.4%。進出口齊齊下跌，絕非最得人驚，市場最恐慌嘅畫面，相信係有一日大家見到進口數據不尋常爆升才對。
點解？如今內地金融體系嘅問題越搞越大，最近仲實施資本賬封鎖，早前中化集團宣佈430億美元海外收購之後，就有個總經理被調查，唔敢講有直接關係，都令人有大把聯想。未來一段日子，應該邊個出去海外買嘢，就係對國家不忠，照計大家都會聽聽話話，唔敢出去亂買海外資產。
唔買資產啫，但可以買日用品吧。短期內要將大額人民幣有效兌換成美金，仍有一途，就係利用貿易走錢。當中可能係製造進口定單，以超高價格向海外買入貨品，人民幣一樣可以輕易兌換成美元。買海外資產，算係一種快速走資方法，至於製造貿易定單嚟走資，速度較慢，但卻難以杜絕，因為貿易賬牽涉民生，唔係話封鎖就封鎖。人民幣滙價唔願貶值，靠貿易賬走資，應該係長走長有。
雖然貿易賬走資，未必對金融體系形成即時龐大衝擊，但預計未來幾個月內，會令人民幣離岸價可能破多一次底，相信港股呢轉反彈過後，就會提前反映呢個因素，所以大市到時可能再受多一嚇衝擊。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com