金手指：快到大貶值時
■騰訊等大陸股靠賺人民幣，若人幣滙率大跌，邏輯結論得一：走為上著。 資料圖片
新年，孫柏文首先祝大家恭喜發財、逢凶化吉。今日未入正題前，想講年初一旺角之事。各位有份參與或心底支持嗰晚街頭市民嘅人士，我有嘢想勸你。你哋嘅對手係冇底線。「唔得就升級再試」呢個概念絕對
合邏輯，和理非唔得，就試和平、違法，再唔得就升到牽涉暴力。
但作為香港人，你做乜都好，個底線都係work唔work先？邏輯上，正面交鋒唔得，就會演變成「不對稱戰術」，即放炸彈。但香港就算炸平，咁會唔會令佢哋讓步？之後你係咪會上北京照打？唔會。
我知唔係因為你怕犧牲，而係你心裏都知，呢個係一個韓戰時話人民食核彈「仲好㖭！」嘅政權。冇底線。去到呢個佢唔覺得香港一國兩制能助一黨專政嘅時代，我哋冇可能「感動」佢哋。我哋未打已輸，因始終有底線。香港人，邏輯結論得一，走為上著。
入正題，呢個假期我閉關思考，對人民幣越諗越唔對路。家陣大陸就算每個月都話有好大額貿易順差，外滙儲備都係月月跳崖式跌。而我知好多人等緊大陸外滙儲備跌穿IMF2.7萬億警戒線（預計數月內），但如我係大陸我就即刻大幅貶值，因銀行系統資本已摧毀，填氹靠貶值。
陰乾式跌啲儲備又頂唔住，除非話事人等緊自己啲朋友走曬資先，如果唔係仲有儲備咁鬱凸加反彈（學瑞士），即睇落自願貶，好過陰乾式令市場覺得你力不從心咁貶。到時被發現儲備係皇帝的新衣咁冇料到，就會被圍剿，政權穩健都出事。所以最能保政權嘅最有效方法係快速貶凸，有理由相信喺數月內跳崖式咁貶值。仲要係突襲咁。問題係，香港最多人信基本因素冇嘢嘅大陸股，例如騰訊（700）、中移動（941），都係賺人民幣。唔好講共產黨倒台級黑天鵝，一個唔大跌唔得兼頂唔住嘅人民幣滙率真係大跌時，滙做港元嘅盈利又會點呢？香港股民，除非美帝齊貶，如果唔係邏輯結論得一，走為上著。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com