笑到最後：長發街市商人出路
領展（823）旗下長發街市商人罷市，代表話唔排除行動升級，去特首辦抗議，甚至絕食。
正如上個禮拜講過，社會係會演進，「和平+合法」示威失效，跟住變「和平+犯法」都失效，就走上「暴力+犯法」之路。家陣政府連掟磗都唔覺得要回應，亦都唔覺得管治有問題，唔通會驚街
市商人抗議同絕食？而且街市商人係得咁多人，一班人去咗特首辦絕食，長發街市就空城，領展吉舖位又可以請返臨時租戶進行「二次擺賣」，街市運作冇影響，原有街市商人自然冇乜談判條件，仲要照交租而冇收入。
反正最後都係要去特首辦示威，本欄建議街市商人去特首辦外擺檔賣菜賣肉，賺返兩個錢傍身。以政府慣性思維，示威、絕食就係搞事，可以搵警察拘捕；但係擺檔就係搵食，趕走佢哋就係阻人搵食，有違政府一向言論口徑，執法未必會咁果斷。
高官唔會去旺角，掟磗當然冇問題，但喺金鐘添馬又另一回事，警察食環一旦掃場，激起民憤，又驚掟磗掟親啲高官，特區政府有機會猶豫不決，長發街市商人喺添馬擺檔玩十日八日，如果吸引到中半山菲律賓女傭或者金鐘一帶外國駐港領事幫襯，發覺價廉物美，施予同情，依靠外國勢力向特區政府及領展董事局施壓，或者會有價講。
不過，講返轉頭，呢啲都只係權宜之計，正如一開始話社會係會演進，香港做內需生意，已經唔係一般小商人的創業天堂，一做就要做統一天下嗰個，贏家全取，否則無力競爭。
香港做各行業要做霸權，如果唔係家山有福買落靚舖位收租，做生意就要爭做第一，最典型例子就係阿信屋（CEC國際，759），一開始就瘋狂開分店，目的就係鬥快搶佔零食一哥地位，不計成本，先做咗行業第一，之後再諗點賺錢。
小至影張學生相，快圖美母公司中港照相（1123）都係一間上市公司。一行出街，香港衣食住行大部份生意，都係有上市公司背景，冇上市點樣競爭。即係話，就算喺行業內統一唔到天下，創業入場門檻都要有上市公司地位照住，例如翠華（1314），開幾間分店時想融資都易啲，亦都令到冇上市嘅行家唔敢貿貿然同你鬥燒錢。
長發街市商人罷市，足以證明連街市賣菜賣肉都步向霸權模式，香港仲有小商人創業空間嘅行業睇嚟買少見少。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com