中環在線 - 李華華 2016年2月22日
中環在線：
「原來他不夠愛我」「越賣越傷心」
代理改編情歌搵生意
■代理喺淡市發揮創意改歌詞，吸引市民幫襯。
今日係農曆正月十五「元宵」佳節，但喺現實生活中，並唔係人人都可以人月兩團圓，個別「宅宅哋」嘅地產代理肯定中曬慘情歌嘅毒㖭喇，否則，佢哋又點可以隨手就搵到幾句慘情歌詞去賣樓盤吖。
老老實實，家陣「窮人恩物」之類嘅金句已經落伍，近幾個月地產代理寫招紙，興起好似《毛記電視》咁玩改歌詞，務求令到男女老幼行過見到張招紙都心諗：「嘩，張廣告有聲嘅喂！」唔買都埋去睇嚇。而選用唔同歌曲亦反映到創作嗰位代理係屬於邊個年齡層。
用坤哥金曲道盡生意慘況
要數年代最久遠嘅應該係《獅子山下》（呢首係改編歌詞慘箒），一句「人生總有歡喜/賣樓亦常有淚」，不過其實近排賣樓嘅人，多數仲有賺錢，可能因為賺少咗而喊。
而上世紀90年代，蘇永康一首《越吻越傷心》唱到街知巷聞，代理版「越賣越傷心/明明無餘地亦再過問」就係對開天殺價嘅買家作出控訴。
去到千禧年代，楊千嬅與容祖兒喺歌壇平分春色，佢哋嘅大熱K歌《小城大事》同《心淡》，亦一齊被改編成「劈下來/豁出去」、「由這一份鐘開始倒數筍盤一瞬間」，同樣精彩。
2015年偽．毒男歌手坤哥吳業坤冒起，《原來她不夠愛我》唱盡觀音兵慘況，生意同樣慘淡嘅代理竟然都身同感受。不過又咁講，與其散發悲情，發放負能量，代理們不如提起精神唱陳慧嫻首《跳舞街》，叫買賣雙方「請不必心大心細」快啲撲槌咪有生意做囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com