中環在線：
王維基自爆曾死過13個鐘
■王維基話，做人做事要多啲感情用事，尤其係大事上。 李家皓攝 
有「魔童」之稱嘅香港電視（1137）創辦人王維基出名大膽，人人以為佢唔怕死，原來因為佢死過！
王維基噚日出席TEDxKowlo
on演講時自爆，佢曾經死過13個鐘頭，但拒絕透露點死法，或者幾時死，只係話，自此以後，佢覺得生命係前路茫茫，明白人生係好脆弱，所以決定以後唔再聽人意見，只會跟自己個心去做事。
去殯儀館提醒自己隨時死
王維基整個演講都係叫大家唔好咁理性，做人做事要多啲感情用事，尤其係大事，盡可能要任性啲，唔好時刻咁理性。點解？皆因事情越大，變數就越多，好多事情根本就冇辦法估到。
至於點樣培養任性？王維基就提供3個方法。首先係要聽歌、睇戲同睇書，因呢類活動可以令人感情澎湃。而佢最like嘅歌，就係鄭少秋嘅《誓要入刀山》，歌詞的確好啱佢。
第二個方法係去殯儀館，體驗別人死亡。王維基解釋，去殯儀館可以提醒自己都會有死亡嘅一日，令佢思考人生餘下嘅時間要做乜，因此，佢不時出現喺北角同紅磡。
第三個方法就係自己去死，即係去接近死亡，例如去汶川大地震災區或尼泊爾垃圾山，去睇其他人點過生活。
講來講去，王維基都係想講，人生無常，好多事係估唔到，佢順便寸一寸政府，指當年忽然獲政府官員主動邀請，叫佢申請免費電視牌照，跟住批埋一幅將軍澳地皮畀佢興建電視城，佢話：「你點估，都估唔到最後尾個結局係咁喇？」呢一刻，佢真係好似黃子華上身，不過令人笑中有淚。
■盛智文（右）噚日亦有現身TEDxKowloon，撐兒子場。 蓋茨克林頓曾任TED嘉賓
TED源自美國，微軟創辦人蓋茨、美國前總統克林頓都曾任演講嘉賓，每人限講18分鐘，提供各類人生智慧。香港版嘅TEDxKowloon早於2012年舉行，一天內由多位講者輪住演講。
TEDxKowloon噚日喺中環PMQ舉行，約500人買票（380元與480元）入場。以往所有講者都講廣東話，今年12位講者，有3位係外籍人士，包括「蘭桂坊之父」盛智文兒子Jonathan Zeman，佢噚日主要講蘭桂坊與香港嘅關係，盛智文當然有捧場喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com