笑到最後：
最應冠名100毛是領展
如果我係領展（823）管理層，我會冠名贊助100毛嘅毛記電視台慶。以領展市值計，三百幾萬只係小數目，商場搞幾個騷請幾個明星都燒咗，反而贊助100毛令網絡世界出現「#多謝領展」，平時反領展嘅左膠會唔知點企位。
因為上次「分獎典禮」已經證明，喺100毛
冠名落廣告，有接近買「贖罪券」嘅功效。上次冠名贊助嘅係Shell蜆殼石油，根據左膠組織綠色和平羅列嘅罪名，「Shell在北極鑽油，傷害脆弱的北極生態」、「奧巴馬政府否決Shell延長鑽油牌照的申請後，Shell竟提出上訴」，證明左膠組織眼中，Shell邪惡到連憲法賦予嘅司法權利都唔配享有。
再加上本地司機組織經常炮轟Shell等本地油公司「加快減慢」。無論係左膠理論定係阻人搵食，Shell都係「國際級」箭靶。
不過，只要幫襯100毛，Shell即刻成功洗底，「#多謝Shell」洗版，有車嘅100毛中產讀者話要幫襯Shell，冇車嘅文青讀者話買生油都要支持。其後左膠組織抽水，竟然畀一眾文青讀者聲討，幫Shell講說話。
領匯舊年8月改名領展，話要「同商戶拉近距離」，企業形象未建立，今年農曆年初，良景邨外判疑似江湖人物「管理員」蝦蝦霸霸，令到企業形象喺谷底嘅領展再次沉底。
公屋富戶購買力強
始終，香港先係領展主要市場，中期業績講過，中國投資不會超過物業總值12.5%，而且領展商場喺香港亦談不上壟斷，不能完全冇公關。領展過去股價同盈利增長，主要係因為公屋富戶驚人嘅購買力。
公屋富戶長年交不合理地低嘅租金，比起供緊樓嘅所謂私樓中產有更強購買力，所以領展商場組合先至咁中產。但係長遠要繼續增長，都要做好企業形象，吸引四方客。
100毛嘅毛記電視冠名贊助就提供呢個機會，對上一次，連「國際級」嘅Shell都得以贖罪，「本土」箭靶領展贊助後都有望洗底。
如果領展社會責任心夠重，直頭應該600萬元包起成個騷，成為獨家贊助，反應好更加要向100毛上下派發領展認股權，等社會知道文青都有機會發財，同時亦可以令文青利益同領展盈利捆綁。
即使100毛一眾文青chok到上宇宙，覺得財經嘢好悶唔想講，但到領展股價升，有錢落袋時，自然體會到資本主義之邪惡，唔會覺悶。就好似打工仔月尾有一日，突然領悟返工的意義一樣。
當然今次畀時富投資（1049）旗下實惠攞咗去冠名，並且已經即刻有人「#多謝實惠」。但係本欄繼續期待臉書終有一日被「#多謝領展」洗版。
高明
即上偶像派財演高明專頁：
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com