智取大市 - 晉佳 2016年4月13日
智取大市：圓底股破位炒重估
■中海物業剛剛突破1.2元頸線；圖為集團主席郝建民。 資料圖片
宏觀形勢無大改變，美滙指數正在下試93左右嘅過去1年低位，有機會形成支持，而喺美滙指數尋獲支持並回升之前，保持短線睇好港股，蜜月期暫時唔理係長係短，炒住先，等美滙明顯轉跌為升、港股由強轉弱之際，先選擇轉軚。
上一期講過圓底股特別受歡迎，近期有中海物業（2669）呈圓底兼守穩保歷加通道中軸，股價由3月中開始一路大漲小回，剛剛突破1.2元頸線，走勢靚仔兼成交增，雖然出現三連陽，但突破頸線後阻力大減，相信唔會升一棍就罷休，加上波幅甚大，單日有本事大成交配合下，升超過一成甚至兩成，相比噚日提及慢升嘅中海發展（1138）作比較，短線或許係更值得入手嘅選擇。
中海物業喺3月14日出現超大陽燭，原因係中海外（688）公佈以310億元人民幣吞併中信嘅地產業務，成為轉捩點。完成交易後，中海外大有機會將今次收購嘅中信旗下2,400萬平方米地產項目，全線交予中海物業管理，呢個規模已相當於中海物業所管理建築面積嘅三成。
再加上中海外不斷向中海物業繼續注入新項目，雙引擎催谷業務，預計中海物業將可由穩定增長，變為高速增長，可見將來業績肯定較舊年純利增幅20.6%為高，令股價進入重估潮。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com