中環在線 - 李華華 2016年4月26日
中環在線：恒大爆「關公」災難
偷懶唔寫新聞稿 搵剪報代替
財經公關界噚日熱烈討論恒大地產（3333）前晚搵公關公司發出嘅一份「新聞稿」，噢，正確而言，公關冇出新聞稿，只係出咗一份「背景資料」，而呢份背景資料，就係兩段傳媒報道。乜𠵱家公關咁易做，發兩段剪報就搞掂，華華都要積極考慮轉行了。
事緣恒大星期日晚出通告，公佈以36億元人仔，買入深圳A股嘉凱城集團逾半股權，照常理，公關公司按住通告內容，簡單寫份新聞稿就掂。
■皓天財經發放《巴士的報》（左圖）和《大公網》嘅剪報，就當做咗嘢喇。 皓天財經慳力
恒大請嚟嘅公關公司，即係上市公司皓天財經（1260）就慳水慳力，出咗個電郵通知大家話有通告，連隨畀咗兩段剪報，話係背景資料，畀大家參考喎。
而呢兩份經「傑出關公」嚴選嘅剪報，咁啱得啱橋，內容大致相同，同樣有引述「證券人士」、「業內人士」估計，恒大買入嘉凱城後，可以借殼回歸A股，而香港呢隻恒大就有機會以高溢價被私有化嘞。
不過換轉角度，呢間公關公司，可能其實真心幫記者切想，免得大家要費勁去追問事件嘅發展，或者去追查葫蘆裏賣咩藥，索性剪埋報畀大家參考，甚至希望大家認真抄考。你以為佢係懶惰豬，佢可能會變嬲嬲豬㖭呀。
不過講開又講，恒大以往好似聘用另一間財經公關公司，唔知幾時轉用皓天財經，大家知唔知呢間公關公司最勁係乜？咪就係個名囉，皓天嘅英文名係Wonderful Sky，係咪好Wonderful呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com