半新股鬥癲炒
2016年04月26日
A股低開，港股沽壓稍增，尾市再受歐洲開市下跌拖累，恒生指數跌幅擴大，收報21304點，跌162點；國企指數收報8986點，下滑134點，成交559億元。
藍籌股大致受壓，騰訊(700) 更是跌市元兇，質低大市40點，收跌1.78%造159.9
元；匯控(005) 下滑1.34%造51.45元；中移動(941) 下滑0.88%造90.5元；建行(939) 走低1.39%造4.98元；康師傅(322) 跑贏一眾藍籌股，逆市升2.34%造9.2元。
半新股近日炒得好興奮，由宏安(1222) 分拆出來的宏安地產(1243) 早上已經爆上，搞到散戶湧埋去炒吓半新股，但升得高插得快，下午佢已碌番落嚟。
宏地快上快落
宏地月前以0.92元掛牌，就係炒你唔信佢升，一直炒到剷上4元，大吸股民眼球。宏安由街市大王鄧清河主政，但佢無做分拆公司的主席。經過最近爆上，呢間小型地產公司市值已經逼近50億元，大過阿媽市值20億元唔止一倍。不過，股票市場投資從來唔係一加一等如二咁簡單，雖然宏安持有宏地嘅股權已經唔止佢嘅市值，但如果你沽咗宏地，絕對唔可以用宏安嘅股票打折嚟找數，所以宏地股價愈夾愈高，阿媽股價一樣可以大落後。宏地收市報3.32元，只升4%，同高位4.27元相差一截，短炒好易人都癲。
有中環茶友話，近幾年政府增加土地供應，好多中小型發展商有機會買地，由於財力有限，佢哋買兩買已經負債比率大升，最好當然可以好似宏安咁拆間公司出嚟搞作吓，關鍵係呢你夠唔夠快手，因為講資產同手頭項目，好多公司大過宏地，但能夠及時出世大玩財技，呢個就係難度所在。好似呢啲公司睇嘅唔係資產有幾多，而係睇股票喺市場嘅供求，呢啲公司贏可以贏到開巷，輸咗就出太平洋。炒呢啲要半癲半醒，最緊要自己執生，知道呢個係投機的我，唔好成日喺度計小學生一加一嘅數，如果做唔到，不如忍吓手好過。
中小地產商炒其半新股，基本上同樓市無關。如果講樓市，有大行就覺得內房反而看高一線。瑞銀就出報告，話內地地產發展商毛利已見底，融資成本有空間進一步下降。尤其是非國企發展商，雖然較難補充土地及提升銷售，但借錢成本下降有助他們維持甚至提升利潤。
至於本港地產股，瑞銀認為，有零售租戶正在縮減商店數目，商品減價10%至20%以催谷銷售。雖然零售商普遍願意繼續保留店舖，但人流及銷售額下降，持續為租金帶來壓力，即使黃金地段亦有類似情況。本港住宅方面，幾乎所有發展商預期樓價由現水平下跌10至20%，大部份發展商不打算推遲賣樓。
瑞銀寧押注內房
該行較看好內地發商，首選華潤置地(1109) 中國海外(688) 和龍湖(960) ，中小型發展商則喜歡富力地產(2777) 及合景泰富(1813) 。本港地產股中，較看好長實地產(1113) 有清晰資本管理，以及新鴻基地產(016) 的執行力與潛在增加派息。
不要睇漏的是該行話明最不看好收租股，包括九倉(004) 、領展(823) ，賣樓股就不看好恒地(012) ，揸住呢啲反彈咗唔少嘅股份，就要諗諗幾時減磅。
陸羽仁
金融High Tea 舊文
來源 source: http://hdfin.stheadline.com