大棋局 - Mr. Tregunter 2016年4月26日
大棋局：日本大國殞落
■日本嘅困局在於其貨幣政策已接近失效。 資料圖片
你細個一定聽過嘅故事。太陽同風喺到爭邊個勁，嘈到面紅耳熱，風忍唔住挑釁太陽：「隻揪啦！」太陽話：「好，下面有個靚女，邊個可以令佢除咗件衫就贏。」話口未完風已發功，但大風吹得越急，靚女將件衫捉得越緊。
太陽拍一拍風嘅膊頭：「行埋一邊啦。」然後施展熱力，靚女條頸滴住汗將外衣脫下。
負利率，就係太陽與風嘅故事。08年後全世界印錢，錢多到瞓喺中央銀行賬戶唔鬱收息，美國超額存款準備金2.3萬億美元，係法定準備金15倍；日本則26倍。
市場欠缺嘅唔係錢，而係錢嘅流轉速度。所以全世界央行唔需要再吹印錢之風，而係要已經印好嘅錢流出去買嘢，要靚女自己心甘情願脫下外衣。
負利率作用如太陽，當存錢喺央行賬戶要罰息，錢自然會流出街。但負利率有極限，IMF研究當負利率超過-0.75%（最多-2%），人們會寧願將錢提出，擔憂未來而囤積更加唔用，反變成如風吹得越急，你捉得越緊。
日本甚至歐盟正處於呢個關鍵位上。既然-0.75%係極限，央行退路已經無多，每出一次招代表越接近倔頭路，唔挾你挾邊個？所以負利率後只要央行一出招，該國貨幣略貶後即倒升，大眾睇死你已黔驢技窮。
貨幣政策近乎失效
美國點解一定要加息，因為要為自己嘅貨幣政策留轉圜餘地，假使美國加一次息已無力，下場將同日本一樣。
日本嘅困局在於其貨幣政策已接近失效，現時日本央行揸日本國債發行量35%，量寬速度不變，2017年底會揸到50%；日本ETF個池約16萬億日圓，日本央行又揸咗60%。咁樣玩落去咪率先變成共產主義國家？日本央行係全球幾個少有的上市央行之一（東京證券交易所：8301），由安倍晉三發功開始股價飆上，現時已腰斬一半，即反映其危險性。
另一個問題，財務大臣麻生太郎講得好清楚，日本企業盈利創歷史新高，但仍然唔願擴大資本支出。企業其實有曬條件加人工、分紅或資本投資，佢哋唔做，而傾向揸現金同存款。問題癥結喺日本經濟迷失得太耐，要切身感受日本迷咗幾耐，用一句話概括，就係30年前去日本食一碗叉燒拉麵800YEN，30年後再去食都係800YEN。企業家已慣咗處於通縮心態，點搞佢都唔想投資。
上個月麻生太郎同Paul Krugman傾偈時提出一樣嘢：30年代美國亦同樣陷入長期通縮，最後點樣搞番掂？係第二次世界大戰。言下之意，你哋啲經濟學家講一大餐，根本冇解決問題。真正解決問題的，係將啲嘢炸爛從頭嚟過，產能過盛不存在，需求自然強烈。
今個月28日日本央行利率會議會出新招，係救命草定最後一根稻草呢？
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com