炒股仔鬥大膽
2016年04月15日
港股升破兩萬一，唔經唔覺已經七連升。個市升到咁上下，大家覺得炒藍籌唔夠刺激，呢幾日開始有啲股仔落鑊，對散戶嚟講，派對家先至開始。
股票市場鐵律係買大開細，普羅投資者永遠企錯邊，大戶才有胡食，散戶炒大環境賭期指如是，賭個股都係一
樣。好似呢期散戶睇淡，大市就係經濟壞消息連出下反手炒上。今個星期指數升到番咁上下，有啲錢炒作吓細價股，但都係搵啲投資者無貨嘅目標嚟出擊，好似全配售嘅創板股固然係炒供求，炒到股仔市值大過TVB(511) 。
影星黃翠如個爸爸做主要股東的建築股聯旺(8217) 上咗創業板，呢兩日成為財經版同娛樂版話題，佢配股價0.26元，昨日最高見過14.2元，單日再升25.9%，收市報11.6元，只升2.8%，市值有145億元，仍然大過翠如BB打工嗰間TVB嘅124億元市值! 中環茶友嘅話題唔係佢有幾威，而係燦爛得幾耐。
散戶無貨先炒上
茶友話，呢啲創業板股係全配售，即係唔使公開發售，大戶揸晒，貨源歸晒邊，股價瘋狂炒上然後散貨，唔係新鮮事物，炒股經驗稍高者都知道。呢個市係鬥大膽嘅遊戲，你舞得愈高，就可以沽出愈少股份就回本，炒作大戶出幾多本錢，敢同落場嘅散戶對賭，就係技巧所在，如果隻股有知名度又估佢散貨位可以攞得較高，沽少少都翻本有利，自然唔怕炒到豬都飛上天。
雖然家資訊爆炸，但好多人炒股仲係矇查查，今日賣10元佢覺得貴，明日賣6元覺得唔平，跌多日去到2元就覺得抵買，再跌多日見1元佢仲去溝貨，根本無去理公司資產同盈利，唔知1元仲係70倍市盈率。大戶如果有膽有本錢，就可以玩呢個妹仔大過主人婆嘅炒股遊戲。
要咁樣炒作，唔多唔少要氣氛配合。好似今個月大市升勢較持續，散戶開始心郁，就有炒作空間。由宏安集團(1222) 分拆的本港物業發展商宏安地產(1243) ，午後突然跑出，一度突破兩元大關，高見2.3元，大升1.24元或1.17倍，收造1.78元，仍急升68%；亞積邦(1496) 亦大升16%，造0.99元；結好金融(1469) 炒高15%，報1.18元；南旋(1982) 同樣急升15%，報1.46元。
宏安結金招股離奇低調
中環茶友話，佢一早有留意隻宏安地產同結好金融，因為呢兩間公司嘅大股東好老友之餘，仲係市場活躍份子。兩間公司係招股時「靜英英」無乜動作，以佢哋嘅人面要做得好好睇睇照計唔難，但點解示人以弱呢？當然，如果個市唔好，不排除佢哋純粹搞公司出嚟上市只為「啤殼」，但個市一轉番活躍，咁玩法就可以唔同。
睇番宏安呢兩年趁地價碌低，接連買咗幾幅地，晉身成為地產商，咁樣會賺多啲錢，但喺項目未賣前財政壓力會大啲，分拆出來就可以搞吓財技。如果計盈利同資產，梗係藍籌抵買啦，但炒股仔又係另一回事。有人話兩個股東都係財技高手，宏地同結好一齊起步，家後者就變成「低水」。
對於呢類炒作遊戲，陸羽仁一向係量力而為，好似飲啤酒有啲泡可以添情添趣，飲到唔停就遲早頂住個胃兼碌低。今日內地出增長數字，如果大戶夾到唔想停，咁呢類炒股仔遊戲就會繼續，呢啲就係大氣候之下嘅小氣候。
港股其實都有小小缺氣跡象，昨日恒生指數高開298點，之後升幅迅速擴大至353點，高見21511點，叫做幾靚仔，後來內地股市短暫回落，港股升勢亦放緩至不足兩百點。恒指全日升179點，收報21337點。
華津國際(2738) 今月掛牌。根據輝立交易平台顯示，暗盤最高見2.99元，收報2.95元，較上市價2.38元高24%，不計手續費，每手2000股帳面賺1140元。
陸羽仁
金融High Tea 舊文
來源 source: http://hdfin.stheadline.com