脫歐鈎象腳
2016年06月17日
美國順應市場情緒唔加息，主席耶倫仲出來唱吓白鴿之歌。喺好消息下，港股卻失重下墜，幾乎插穿兩萬點。
聯儲局昨日結束兩日議息後，維持利率不變。市場最注目係與會官員中，大部份官員認為今年預計會加息兩次，但當中有6名官員預期只會加息一次，換言之與原先美
國今年加息3至4次的猜測變得愈來愈遠。
博留歐未必要買匯控
美國唔敢加息，內地仲開始出現放水預期，花旗中國區首席經濟學家劉利剛預期，人行將於6月、7月下調存款準備金率一次，全年累計降準三次，至於會否減息須視乎通脹情況，若通脹降至2%，今年第三或第四季有機會減息，估計全年減息一至兩次。
全球息口疲軟，但華爾街反應唔係咁興奮，杜指由升轉跌，收市唔見咗36點，香港一開就插，而且沽壓全日無減。
星期三摩根士丹利宣佈A股暫時不獲納入新興市場指數，內地股市反其道而升，甚有無形之手見壞消息撐住個市的味道。昨日美國唔加息，輪到好消息兌現，但於是凌空飛起嘅股份紛紛下墜，無形之手似乎見局面稍穩，於是縮一縮。
星期初，陸羽仁講過全球債息超低嘅隱憂，呢種境況已經係超前反映美國加息無力，就算聯儲局官員出嚟嘅言論鴿味濃，市場都無好感。不過，由於息口短期無得加，市場嘅拋售力量相信唔會好大，個市會唔會繼續插，跟住就睇英國脫歐公投結果點。
本來，市場普遍預期英國留歐機會大，家脫歐聲勢比預期強，市場情緒又開始有啲緊張，匯控(005) 股價昨日再插，逼近一年低位45.05元水平。瑞穗證券亞洲首席經濟學家沈建光形容，市場普遍對英國脫歐欠缺準備，萬一「脫歐」，將成為今年最大的黑天鵝事件，屆時人民幣匯價都會面臨很大貶值壓力。他認為，英國「脫歐」是不理性的，在經濟上對英國及歐盟都不利，相信脫歐機會不大。
脫歐賭大細，未揭盅就鈎到大笨象腳軟，連日來匯控股價由50元插落嚟，昨日收跌2%，收報46.4元。有中環茶友心思思想撈底，佢條數喺家插落嚟，如果英國唔脫歐，股價上番去就執4元，如果脫歐股價再插4元，就去到42元，屆時市盈率8.5倍，歷史息率9.5厘，照計有得守吓啩，佢估計留歐機會率大啲，所以想等位落注。陸羽仁就話，買股有業務風險，若然淨係想賭佢脫歐留歐，買英鎊都得啦，又何必走去買股，因為跨國銀行股始終面對不利嘅經營環境，無論脫歐留歐都一樣喎。
銀行教路買金沽鎊
恒指曾跌穿20000關，收報20038點，重挫429點或2.1%；國企指數收報8409點，下滑199點或2.32%；紅籌指數收報3446點，下跌79點或2.27%，成交金額628億元。除咗匯控，科網巨股騰訊控股(700) 都跌得唔輕，收市下挫2.4%，收報168.8元。
上海迪士尼開幕，呢次股市就攞景多過贈興，相關概念股不升反跌，5月載客量升5.6%的東方航空(670) ，股價挫4.8%造3.99元；錦江酒店(2006) 都急跌4.8%造2.77元。
最好嘅板塊係金礦股，金價連升6日，重返1300美元關口，一眾金礦股逆市造好。招金(1818) 再創近期高位，抽升7.8%造7.96元；紫金(2899) 炒高9%造2.5元；靈寶黃金(3330) 飆7.4%造1.59元；中國黃金國際(2099) 升4.9%造14.26元；SPDR金ETF(2840) 升2.05%造970元。金價升得咁緊要，據講係因為好多銀行無嘢炒，於是叫啲客炒吓金，進取啲嘅仲買金沽鎊賭一鋪，於是谷到黃金起咗煙。
陸羽仁
金融High Tea 舊文
來源 source: http://hdfin.stheadline.com