財路：不妨短炒新晨動力
■新晨動力潛喺上市以嚟低位；圖為集團主席吳小安。 資料圖片
新晨動力（1148）呢個月中，有四個交易日，成交過1,000萬股，一年嚟少見。集團潛喺上市以嚟低位，家陣得六倍PE，街貨市值得5.5億元，買turnaround，有得諗；趁鑊氣足，短炒一轉，亦絕對有得諗。
新晨主打發動機，2013年由華晨（1114）分拆上市，現價1.38元，比上年高位4.3元，累跌69%，兩大股東華晨同五糧液，加埋基金大孖沙鄧普頓，佔咗新晨69.4%比重，新晨實際街貨市值得5.5億元。個point係，新晨細奀市值，一turnaround，仲唔炒到甩轆？
新晨今個半年度，盈利1.28億元（人民幣．下同），略減1,800萬元，但呢個半年度，比上年下半年7,860萬元盈利，係有增長。
上年，新晨有人仔滙兌損失3,267萬元，粗略計數，就算唔計呢筆虧損，新晨上年下半年盈利1.1億元，集團今個半年盈利，仲係比上年下半年好。
新晨上年獲寶馬授權組裝王子發動機，呢款發動機，被喻為同排量發動機當中超班馬，新晨亦講明，王子發動機會喺明年推出，集團亦已經成立團隊，銷售呢款發動機，市場反應正面。數數手指，仲有三個月就踏入2017年，新晨憑住新產品，照計掂檔。
好保守計數，新晨今年EPS只係keep喺0.207港元，得6.7倍PE。隨著王子發動機開波，新晨明年EPS增長20%咁大把，到近0.25港元，預測PE得5.6倍！
煲新晨，當翻半番去到兩蚊計數，明年預測8.3倍PE，都仲係比本身上市以嚟歷史平均11倍PE，平咗25%！
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com