套現最實際
2016年09月20日
港股果然喺美國議息前有偷步入市，指數借住北水重開推高番啲，不過資金主要都係換馬為主，升得多嘅股份要讓路畀中資股。
中傳動股東唔欣賞換股方案
個市氣氛好番，呢番公司活動都多左，中國高速傳動(658) 與豐盛(607) 啱啱就聯合公佈，建議
每持有兩股中傳動將獲發5股新豐盛股份，相當於中傳動每股收購價值是10.95元(根據停牌前豐盛股份4.38元及每兩股中傳動股份獲發5股豐盛股份的兌換率計算)，較停牌前溢價約46.59%，換一個角度看，每股新豐盛股份的引申發行價為2.99元，較停牌前豐盛股份停牌前折讓約31.74%。
中傳動與豐盛下午復牌雙雙報捷，中傳動一度急升25%，報9.4元，收報7.86元，升幅收窄至5.2%；豐盛收報4.56元，升4%。現時豐盛董事會主席季昌群旗下公司持有中傳動9.08%股權，交易完成後，豐盛將再持有中傳動90.92%股權。
中傳動自2007年於聯交所上市，是中國風力發電傳動裝置領先供應商，市值係128億元。至於豐盛喺2002年上市，主要業務為於中國之綠色建築，睇番佢過去三年，股價由幾毫子升上現水平，累升超過10倍，市值飆到724億元。早排公司透過配股引入華融，好明顯係為併購鋪路。
過去豐盛盈利相當波動，升到現價市盈率去到43.9倍，遠高於中傳動嘅10.6倍，所以佢今次印公仔紙去收購，不但不會產生任何現金流出，而且以高市盈率即貴價股票，去換低市盈率即平價股票，睇落相當着數。
如果用昨日收市價計，5股豐盛市值係22.8元，如果佢嘅股價可以撐住，咁即係每股中傳動收購價係11.4元，中傳動股價昨天上升亢奮後回落，只收7.86元，變成明顯有好大折讓，咁代表好多股東覺得換取高市盈率嘅豐盛股票唔吸引，寧願先食胡套現而唔等收購。
另一方面以豐盛股東去計，O依家應該沽出豐盛股份，買入中傳動套戥，不過，睇豐盛呢排升得咁勁，相信街外有貨可沽嘅股民都唔會好多嘞。
人仔受壓 中資股受捧
呢排離岸人民幣拆息持續抽升，市場估計係因為二十國集團峰會後，外資再度投機人民幣貶值，於是內地再夾高離岸人仔價對付炒家，由於O依家離岸資金池大為縮小，所以息口一夾就飆。
金管局發言人表示，留意到近日離岸人民幣拆息上升，反映資金供應緊張，將密切監察離岸人民幣市場，但重申拆借市場整體運作有序。財資市場公會數據顯示，人民幣香港銀行同業隔夜拆息定盤價升至23.7厘，較上周五大升近16厘。
市場對人仔匯價壓力始終有戒心，造成憧憬北水繼續南下，恒生指數假後高開151點，午後升幅一度擴至290點，高見23625點，恒指收報23550點，漲214點或0.92%；國企指數再度跑贏恒指，收報9747點，漲152點或1.58%，成交金額725億元。
昨日藍籌以中資金融股表現較佳，建行(939) 升1.4%，報5.89元；中行(3988) 漲1.7%，報3.61元；呢個星期表現不俗嘅國壽(2628) 升4.4%，報21.5元，是升幅最大的恒指成份股。
雖然內地陸續有二線城市收緊樓控，但資金借於內地樓市8月再升炒股，多隻內房股造好。中海外(688) 升2.7%，造26.25元；華潤置地(1109) 漲3.9%，造22.55元，向聯想控股(3396) 收購項目的融創(1918) ，股價飆7%，造5.87元；綠城(3900) 升6.5%，造7.05元。
陸羽仁
金融High Tea 舊文
來源 source: http://hdfin.stheadline.com