金手指：聯儲局將被清算？
■全花旗國政府最冇需要問責嘅機構，一定係聯儲局。 資料圖片
仲有兩日，聯儲局就會喺香港時間禮拜四淩晨，發佈佢哋嘅議息決定。債市價格反映，好細機會加息。不過，孫柏文今日呢篇文，唔係想分析加定唔加，而係唔加息會點。仲有，唔係分析唔加息會對資產價格點，而係唔加息會
對聯儲局點。憲制上，全花旗國政府上上下下最冇需要問責、最冇王管嘅機構，一定係聯儲局。試諗嚇，政府做乜決定都可司法覆核，不過你有冇見啲人可以司法覆核聯儲局嘅議息決定？甚至立法（即國會）、行政（即總統）都幹預唔到聯儲局運作。聯儲局會用呢啲作為賣點，話「獨立」就係貨幣政策信心嘅保證！
冇王管、「專家」主導，其實可以被國民接受。不過一定要該機構知道自己做緊啲乜，啲話事嘅專家，畀到人冇出錯嘅感覺。但係𠵱家最大嘅問題，就係唔好話花旗國人，連香港人都覺得聯儲局啲決定出曬事。得嗰啲想希拉莉贏特朗普嘅人，即冇受屈辱、甚至係現今制度嘅贏家，先覺得聯儲局冇事。
上周，特朗普已經指明話，如果聯儲局喺禮拜三唔加息，就只係幫民主黨托市到大選。所以如果聯儲局真係唔加，而特朗普贏，有可能特朗普會將聯儲局現有嘅冇王管狀態剷起。純講博弈，唔加息，之後希拉莉贏，一切照舊；不過特朗普贏，剷爆行政獨立，被清算。不過如果加息，之後希拉莉贏，都係一切照舊，而特朗普贏，佢會有個落台階唔使鬱你。咁，你加？定係唔加博希拉莉贏？
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com