金手指：清算聯儲局會點？
■如果聯儲局真的被清算，炒耶倫算是最樂觀的想法。 資料圖片
上周，孫柏文講過如聯儲局唔喺上周二會議加息，而真係畀已多次評擊零息加量寬嘅特朗普贏到花旗國總統，聯儲局將被清算。上周二，聯儲局真係唔加息。
你會問：「咩叫清算先？係咪炒咗耶倫？」要估特朗普點鬱聯儲局
，將佢嘅怨憤化為行動，首先就要睇特朗普搵咗啲咩軍師。睇啲軍師，佢哋全部都學特朗普咁，唔係建制派，即唔似希拉莉咁，唔信聯儲局及其貨幣政策係神聖不可侵犯、唔可以被批評。第二，啲軍師覺得美元唔係要「強」咁簡單，而更重要係貨幣係一個政府對人民購買力不被削弱嘅承諾。第三，就係低息、量寬帶來嘅財富不均，除為社會帶來動盪，更係道德破產嘅政策。
喺咁嘅情況下，對聯儲局，炒耶倫算最樂觀。我相信最少都會成立改革委員會，全面檢討聯儲局運作，同埋同政府其他部門嘅關係。
除軍師名單外，睇捐贈名單，特朗普差不多冇銀行業嘅人捐錢畀佢，希拉莉則收錢收到手軟。咁銀行業從業員作為零息、量寬最大得益者，淨係睇佢哋捐錢去邊，已知今次會來真打聯儲局。
特朗普贏，12月點？儲局知一班覺得零息、量寬邪惡嘅人來勢洶洶，理性嘅就會做官僚自保嘅最高招，即「你要乜畀乜」。但英國脫歐公投前，英揆卡梅倫哀求歐盟畀啲讓步等佢交差，都被歐盟婉拒，最後引火自焚。儲局9月冇加息，之後係咪會驚被削權而會民選總統「要乜畀乜」，定係好似歐盟踏上瓦解之路，就要睇。天佑港幣、港樓。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com