央行抽水 港股腳軟
2016年09月27日
港股昨日插水，除左外圍美股上周腳軟之外，周一內地A股失重，上證綜指下滑1.8%的影響仲大，因為今次係9月14日以來首次跌破3000點關口，報2980點。要留意嘅係，內地三點收市後，恒指仲未止瀉，顯示港股自身亦乏力。
港股開市乏力，但下午
跟內地愈跌愈多。本來大家估計期指結算前，港股回調力度有限，但隨著A股因為央行加大力度抽水引起憂慮，A股成為拖住港股後腿的重擔。
據央行網站消息，昨日進行了1200億元14天期逆回購(即放水)、100億元28天期逆回購，但問題係公開市場今日有3750億元逆回購到期(即收水)。據此一加一減計算，央行今日淨回籠資金2450億元，單日「抽水」力度達到3月4日以來最大，也結束此前連續9個交易日淨投放。基準貨幣市場利率對公開市場操作做出明顯反應，7天期Shibor利率漲3.3個基點。
QFII撤買股規定
有交易員表示，由於國慶同跨季因素，加上公開市場到期量將近萬億，資金面依然面臨一定壓力，市場情緒難脫謹慎，目前仍需繼續關注央行後續的操作力度。
市場仲有一個唔係咁利好A股嘅消息，係彭博社援引知情人士稱，中國證監會做出窗口指導，取消此前對QFII(合格境外機構投資者)資產配置中，股票配置不低於50%的要求，允許QFII靈活對股票債券等資產進行配置。
喺央行抽水下，滬指跌53點，跌1.8%；深證成指報10392點，跌217點或2.05%。滬市全天成交1623億元人民幣，深市成交2629億元，滬股通剩餘額度133.28億元，流出3.28億元。
唔知係咪內地水緊，呢排港股通流入資金都減少，所以恒指呢排都係想升但無力，昨日仲大插左落嚟，尤其午後沽壓沉重，恒指最多瀉410點，低見23276點，尾市跌勢略收斂，最終險守23300點收市。恒指收報23317點，急挫368點；國企指數收報9629點，下滑166點，成交金額646億元。
藍籌股近乎全線捱沽外，有幾個板塊跌得特別甘。由於iPhone 7傳出在美國以外地區，首周銷售量較去年iPhone 6S大跌25%，蘋果概念股瑞聲(2018) 失守80元大關，挫4.7%，造77.6元，為表現最曳藍籌股；高偉電子(1415) 也降3.4%，報2.85元；通達(698) 跌2.73%，報1.78元。蘋果新機開賣，陸羽仁已提醒應該係食胡時候，照睇O依家都唔可以咁快話佢地見左底。
個市插得咁勁，另一個原因係呢排好勁嘅科網及軟件股都出現沽壓，股王騰訊(700) 跌2.4%，造213元；金山軟件(3888) 挫4.7%，造18.08元。
阿爺財金政策面對兩難
另一個麻麻地嘅板塊係內房股。內地城市重開限購政策，中海外(688) 跌2%，造26.7元；華潤置地(1109) 挫3.5%，造22.45元；融創(1918) 挫4.6%，造5.8元。
其實，央行短期動作固然搶眼球，短期人民幣入籃都係一個不穩定因素，因為內地經濟仲未有太大起色，加上美國又話年底有可能上調利率，金融市場牽引力度悄然已起變化。
法興企業及投資銀行首席中國經濟師姚煒就話，內地嘅政策都有啲兩難，經濟增長放慢及結構調整下，短期仍需要財政政策及基建措施支持，但目前樓價上行壓力大，央行又不宜有太多貨幣刺激政策，另一方面，經濟增長放慢，令央行中期有需要推出更多貨幣寬鬆措施。佢預期今年內地經濟增長有6.6%，硬著陸機會由30%降至20%，人民幣匯率明年第三季或見7算。
喺呢啲因素夾雜下，短期市況都係比較波動，所以除非大把現金無碇使，否則撈貨唔使咁急。
陸羽仁
金融High Tea 舊文
來源 source: http://hdfin.stheadline.com