Can Bank：
結婚派利是畀幾多？
■今年新人結婚平均開支錄得自2009年以來首次下跌。 資料圖片
上次講過租樓，今次不如講嚇結婚開支，生活易剛公佈今年結婚消費調查，顯示今年新人結婚平均開支竟然錄得自2009年以來首次下跌，至2013年水平，即約30.22萬元。雖然結婚
只係一對新人兩家嘅事，但炸彈可以炸到一街都係，所以重點又放在人情上，令人費解嘅係喺開支下跌之下，酒樓人情公價已經升到去700元。
事實上，結婚好多時都會超支，好多新人唔覺唔覺使嚇使嚇，都唔知啲錢使咗去邊度，其中一項最唔覺意會使大咗嘅就係利是，好多人研究人情需要畀幾多，咁對新人又應該畀幾多利是酒樓或酒店嘅waiter呢？
綜合過往朋友或親人結婚，以及朋友嘅朋友嘅經驗，一般分兩種，其中一種係酒樓，部長一般會畀500至1,000元、經理100至500元、服務員50至100元；大廚500至1,000元，貼士另計。星級酒店方面，經理級以上最少1,000元，個別總監2,000元，服務員最少100元；大廚2,000元，貼士另計。
以上只係個人了解嘅行情，無正式統計。不過以親戚結婚經驗，在某五星酒店中菜廳，每圍貼士數千，唔太清楚事前有冇畀其他利是，當晚服務周到，所有服務員都有求必應。
其實貼士、利是同人情基本上一樣，成本難計，值唔值見人見智，貼士嘅嘢，服務周到嘅、budget有鬆嘅，相信新人在大日子之下唔會手軟。同樣人情嘅嘢，你同佢夠老友嘅，都唔會睇公價唔公價。
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com