大棋局：中國審判日（完）
■只要人民幣帶頭貶值，其他亞洲國家就會跟住貶。 資料圖片
當預期一隻貨幣會貶值，點樣可以賺錢？其中一種方法就係借呢隻貨幣。走去借680蚊人民幣，兌換成100美元，倘若人民幣兌美元稍後跌至7，100美元可換回700蚊人民幣，還680蚊人民
幣，20蚊人民幣落袋。為方便說明先撇除利率等因素。所以money market fund最鍾意搵中長期穩定貶值嘅貨幣，方便做carry trade，過去呢個角色係日圓。
大眾最關心嘅兩個問題，人民幣會急跌定慢跌，同埋會跌幾多。一次性貶值等同落閘放狗，外資被鎖死，外滙流失壓力大減，但外債沉重嘅企業好易一夜破產。慢慢貶值對企業衝擊力細，但大眾會爭先恐後換外滙，早換早享受、遲換蝕幾嚿，央行維持滙率秩序嘅成本大增。
按現時情況，中國恐怕會選擇後者。人民幣貶值預期已形成，改變唔到就惟有順住個勢諗辦法得到其他嘢，而呢樣嘢正正係中國夢寐以求：人民幣國際化。人民幣雖然被納入SDR權重，冇街外人用嘅話有名無實。貶值預期可以吸引人借貸以人民幣計價，亞投行就有得發揮。
至於跌幾多，英鎊由07年高位至今貶值40%，日圓由11年高位貶值至今亦30%。跌10%以內唔叫貶值，只係調整。真係要貶值化解資產泡沫壓力就係20%以上。想各國收人民幣做儲備要畀折頭，新股IPO前都要低價批股畀大孖沙，大孖沙見有水位先會大手入貨。
G20後各國協議滙率保持穩定，卻好似鴻溝和約，當協議好楚河漢界，張良立即向劉邦進言：「取天下就在呢一次背信。」尋常人要講信用，但國與國之間嘅政治協議，不宜太純情。亞洲多國貨幣已蓄勢待貶，只要人民幣一帶頭貶值，其他國就會跟，抵銷人民幣貶值效力。嚟緊我哋首先會見到中國遊客大量消失，就如九十年代後日本遊客消失一樣。用透支未來借嚟嘅繁榮，係時候要還。
Mr. Tregunter
本欄逢周二刊出
延伸閱讀：
中國審判日（一）
http://bit.ly/2dhiLyk
中國審判日（二）
http://bit.ly/2duePIZ
中國審判日（三）
http://bit.ly/2dNWO93
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com