股仔輪流爆炒
2016年10月25日
港股喺二萬三千點之上浮游，個別股仔爆炒，大股暫時就未有睇頭，大型半新股郵儲銀行(1658) 仲跌破底價創新低㖭！
呢排好多新股上市，無奈整體乏善足陳，大嘅固然唔係好得，細嘅就算認購爆晒錶，都唔代表可以玩好耐。今年最大嘅郵儲銀行破底，收報4.6元，跌3.4%，低過招股價4
.76元。大行瑞信仲踩多一腳，發表報告話郵儲銀行雖然業務獨特，當中8298個專有網點有31758間郵局輔助，但預計郵儲行明年市帳率達0.88倍，比四大行的0.66至0.92倍屬第二高，加上市盈率達8.4倍為業內最高，因此判斷其估值偏貴。
郵儲銀行終於破底
呢隻巨股喺上市後，長和主席李嘉誠就披露以衍生工具入咗股，陸羽仁當時有個疑問，係李超人用乜嘢衍生工具入股呢？按照一般做法，用衍生工具買貨，最普遍係等如開個認沽期權出嚟，即係先收息，若然股價喺結算日破底，咁就要接貨。若然係咁，李超人入貨價就會低過招股價，而且郵儲銀行本身息口唔低，衍生工具提供嘅息要仲高，先至符合大戶要求，咁即係大戶先收高息，再等執平貨。按照呢個邏輯，散戶就要應該等執平股，唔使急急入貨。
郵儲銀行係今年上市嘅大股，加埋其他大股，今年港交所有望做全球集資冠軍。新股上市多，但曾經幫好多公司上市嘅紅籌之父梁伯韜就贈興，認為呢啲只係表面風光。佢話O依家啲新股上市，投行要搵埋基礎投資者捧場，結果係內地嘅企業捧番自己友場，外資投行無得做之餘，仲搞到好多孤兒股。由於新股上市靠基礎投資者撐場，實際集資功能不進反退，佢仲意興闌珊咁講，話新股集資功能弱化，自己都唔做投資銀行家好耐喇！
A股高收拖升恒指
紅籌之父咁講，有人會覺得佢係葡萄，但更多人認同係O依家好多新股上市，甚有「?完鬆」嘅味道，上完市就浮浮沉沉，大股無表現，細股仲隨時散埋。以前股民鍾意「打新」，後來由「打新」變「打柴」，仲屢試不爽，自然唔制。有人會話，新股上市係為咗集資，唔係為咗畀散戶賺錢攞利是，咁講都係啱嘅，之但係咁就變成自己友托自己友，大家圍爐取暖，玩得幾耐就真係唔知嘞。
大市喺朝早略回後上番，下午借A股造好高收，恒指收報23604點，升229點；國企指數收報9852點，漲166點，揚23點，成交金額741億元。有報道中銀香港(2388) 就出售集友銀行達成協議，其後公司澄清報道不實，中銀香港股價升4.5%，報28.15元，為全日升幅最大藍籌。煤炭股及乳業股受追捧，中煤(1898) 大升7%，造4.78元，神華(1088) 升3.8%，造16.72元；兗煤(1171) 旗下兗煤澳洲第三季商品煤銷量升18%，股價漲5%。伊利收購正在停牌的中國聖牧(1432) 消息傳出後，一眾乳業股受追捧，獲大行升評級的現代牧業(1117) 大升11.98%，造1.87元。
呢排大股無方向，細股反而日日有得炒，昨日輪到隻威華達控股(622) 爆炒升67%至0.51元後停牌，睇番公司早前宣佈向民眾金服(279) 收購證券買賣業務Smart Jump全部股權，代價12.95億元，包括現金9500萬元以及12億元5%承兌票據，完成後威華達將持有Smart Jump 88.22%股權。
威華達前身喺深圳搞吓房地產，但近年轉趨沉寂，O依家佢市值已有37億元，勉強算係中型股，呢次爆炒相信係憧憬轉型，呢類炒概念嘅嘢有一定風險，所以跟風唔緊要，最緊要係留意風頭火勢，隨時都可能轉向。
陸羽仁
金融High Tea 舊文
來源 source: http://hdfin.stheadline.com