大小股東分食肥肉
2016年10月18日
美國聯邦儲備局主席耶倫又創新詞，提出高壓經濟嘅說法，市場解讀佢係為年底加息鋪路，但加完息口可能就會暫停上調。美股就對呢個說法反應溫和，收市微升幾十點。不過港股跌開有條路，一時難改弱勢，恒指繼續再試低位。
ABC股碌低拖累恒指
雖然耶倫話乜高壓經濟，暗示加息有個譜，
但美匯始終有支持，人民幣續弱。喺人仔不振下，B股下午急挫，拖累A股大跌，尾市稍為喘定，上證指數收市插咗0.74%，收3041點。港股再插，成交縮至只得536億元，比上個交易日再跌11%。
颱風襲港，多少影響大家入市情緒，恒生指數周一低開，跌到兩萬三下有買盤吸納，港股跌幅收窄至不足一百點。內地股市午後轉弱，港股沽壓再度增加，恒指收報23037點，下跌195點；國企指數收報9541點，跌60點，成交金額536億元。藍籌股大致受壓，中資重磅股被插，中移動(941) 為跌市元兇，拖累恒指32點跌幅，股價跌1.81%造92.15元。
總理李克強訪澳，陸羽仁話唔好望中央有嘢益澳門，佢一走，就有報道中國當局於星期四晚拘留18名皇冠度假集團員工，包括三名澳洲公民，市場擔心事件引發有關向中國賭客收取債款的問題，觸發濠賭股下挫。金沙(1928) 與銀娛(027) 更霸佔藍籌跌幅榜首兩位，金沙挫3.3%造33.85元；銀娛則瀉4.13%報29.3元；新濠(200) 仲大瀉7.1%造9.55元，其他賭股普遍跌2、3%。
王氏港建傳賣盤
跌市中，工業股王氏港建(532) 傳出賣盤傳聞，股價連續兩日急升，而且成交大增。佢收市升咗16%，報1.06元，非常搶眼。
王氏港建係老牌工業股，大股東作風殷實，過去幾年業績雖然無乜增長，不過平平穩穩，維持有息派。佢上市多年，基本上冇乜集過資，可以話用唔到上市股票公司嘅地位，從呢個角度來講，有人肯出價買殼，識得應該唔好蹝。喺呢幾日股價起步前，佢是值得六七億元，淨係上市地位都值番咁上下，其他業務同資產完全無反映，所以佢身價應該遠高過帳面值1.6元。
講到王氏港建嘅資產，可以分開兩部份，一部份係電子業務；一部份係地產業務。電子業務基本上有錢賺，應該值多少錢，但更值錢可能係佢幾年前將觀塘總部重建，呢個商廈喺新地APM隔離，跟住觀塘地鐵站，交通相當方便。若然大股東想收起呢件資產，O依家應該係最後機會，因為觀塘物業後市向好，O依家唔買將來可能仲貴。
王氏港建要賣盤嘅話，大股東點頭應該就可以，但如點樣處理資產就可能有啲複雜。好多年前王氏港建曾經提出私有化，結果唔成功，主要係股壇長毛持有一批股份，佢提出反對結果就搞「彎」左。當時大股東為左私有化使左一筆專業費用，最後無功而回，同股壇長毛都有啲不歡而散嘅味道。
私有化失敗後，王氏港建股價長期低迷，基本上無去過私有化嘅價錢，所以對小股東來講，當年堅持好價唔接受私有化，雖然保留到股份到今日，可能享受到更大嘅私有化升值機會，但過程就唔係咁盞鬼。
王氏港建O依家嘅狀態，出售上市地位係好合理嘅做法。只係今次如果買盤，唔知有無同其他股東摸底傾埋，如果無，就要諗吓點樣可以大小股東搞掂條數，分食到呢舊肥豬肉。市場上，類似王氏港建嘅三四線老牌工業股都有好多間，佢嘅做法可能都會引起其他人照辦煮碗嘅興趣。另外，於香港從事地盤平整工程的分包商東盈控股(2113) 首日掛牌都算叻，收市較招股價0.7元高14.29%，報0.8元。
陸羽仁
金融High Tea 舊文
來源 source: http://hdfin.stheadline.com