金手指：不問價追鱷魚恤
■鱷魚恤有神級資產負債表，淨資產值每股1.6元。 資料圖片
鱷魚恤（122）呢兩年都因傾收購而爆升。2015年初，0.6元上到2元。2016年初，就0.8元升到1.5元。兩次都撻Q，賣盤失敗。佢有神級資產負債表，淨資產值每股1.6元（昨收1.19元），仲要係啲
易賣物業組成。加埋主席林建明12月話過一路有買家傾。大家估嘅係會否再撻Q？
因上周五收市破三個月高位，孫柏文周末搵咗十億老炒家前輩問。傾完，決定寫今日篇文。老炒家：「由兩年前開始至今，根本一路都有人傾offer。我呢幾日都聽到，起碼兩個超兩蚊嘅出價喺枱。」我：「咁即唔賣啦！」
老：「你都神神哋！祖業麗新就可能係。鱷魚恤由30年前林百欣買來，根本係trading asset。一路唔賣，係因未到理想價。水皮嘅人誤會，高過市價賣就係理想價。」我：「嚇？」
老：「佢哋經97年買Furama一役後深明，喺97年平過市價賣好蠢？喺03年高過市價沽，就好叻咩？理想價唔係幾高，而係幾時。之前，鱷魚恤似一切照舊，冇賣唔奇。不過舊年年中起，由斬分店數目，到啲朋友聽林氏對樓市嘅口氣，佢知以今日嘅樓價真係賣得出鱷魚恤，成個家族就會一洗烏氣，冇人會再笑佢哋timing差。佢係聰明人，個deal今年內成。肥仔，呢排股價走勢似快來料。」
最後，原來老炒家喺2015年入咗唔少，平均價1.5元，仲話打死都要「等到停牌（即出收購公告）先沽」，現價買會低佢好多。順風車最好搭，大家仲唔不問價追鱷魚恤！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com