中環在線：貝老幼子復修舊中銀
延續三代情
■貝禮中（左）昨與中銀高層出席活動。
國際著名建築師貝聿銘（貝老）最令港人深刻嘅係設計高聳入雲嘅中銀大樓，而舊年起舊中銀大樓大堂亦進行復修，年中完成後將成為中銀香港私人銀行總部，背後建築師原來係貝聿銘細仔貝禮中。
今年67歲嘅貝禮中喺美國成
長，1976年喺哈佛大學取得建築學碩士學位後，即到貝老嘅建築師樓工作，及後同兄長創辦貝氏建築事務所，現時定居美國紐約，作品遍佈世界各地。
憑舊照將風格還原
不諳廣東話嘅貝禮中，噚日用英文興奮談到舊中銀大樓、近2,000平方米嘅復修工作。最大挑戰係1988年租畀新華銀行、其分行遷入時，部份原有設計被改動，現時則透過舊相片、資料還原舊時風格，並用最好嘅物料復修大堂柱躉、天花頂部。
不過部份柱躉並不能完全復原，需要重建，要尋找同類雲石等建材屬於復修嘅挑戰之一。而喺保留原始窗戶同時，喺採光上亦有特別設計，令舊中銀同社區融合。
貝禮中未有透露收取多少設計費，不過坦言任何一位建築師都想參與舊中銀呢個歷史建築復修工作，對此感到榮幸，而更重要嘅係貝禮中嘅父親、同祖父貝祖詒與中銀嘅三代情。
貝祖詒當年逃難到香港，及後成為中國銀行香港分行經理，1946年更成為中國銀行行長，及後國民黨戰敗後，貝祖詒逃到美國，兒子貝老因緣際會成為新中銀大樓設計者，而貝禮中復修舊中銀大樓，亦係貝氏三代與中銀緣份嘅體現。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com