低溫慢火收息股
2017年02月14日
美股再創新高後，市場普遍睇好港股高開，恒指初段不負所託造好，但之後都略有反覆，呢個情況顯示左兩樣嘢，一係個市升到咁上下，開始接近去年高位，喺低位買貨者開始多啲回吐；二係入市嘅資金唔算好多，所以升勢只能一段段咁創高，咁係爆炸式升到開巷。
雖然
個市升勢唔係咁誇張，但拉鋸一輪又再上，指數升得唔算多之下，但紅色股好過藍色股，亦有唔少股份創新高。O依家個市有兩類股造得比較好，一類係中資嘅大股，尤其係略為落後嘅股份，譬如好似國壽(2628) ；但O依家亦有另一類有實績嘅二、三線，好似我成日講嘅招商中國基金(133) ，以至股仔慢慢火煲起。
招商中國基金置換資產
招商中國基金昨日收報12.16元，升左0.8%，佢爬升得較慢，但係都創左一年高價，即係過去一年買佢都贏錢。呢隻股我過去有提過，佢本身有唔少投資，基本上可以當佢係買內地股市而派息相對穩定嘅工具。佢O依家雖然創左一年新高，比起佢喺A股大時代創出嘅22元高位仲有大截差距。
由於內地市場喺去年上半年表現差勁，基金轉盈為虧，但公司不斷置換資產，早前公佈公司實益擁有4393.6萬股興業銀行A股，既定政策為以循序漸進方式出售持有的興業銀行權益。而喺去年底，公司透過旗下深圳天正與榮寶齋、榮寶齋文化簽署借款及轉股權協議，天正同意向榮寶齋文化提供一筆為期5年的現金3億元人民幣借款，並在該期間有權選擇將借款資金轉換成榮寶齋文化的股權。公司買賣策略係不斷沽出已增值資產，再投資有潛力項目。
現時公司資產淨值有32元，不過派息會受公司投資表現影響，好嘅時候會有特別息，最保守計當佢起碼有3厘息，若派特別息可以有7厘以上。呢啲股買佢唔會發達，如果睇好內地中短期投資，呢啲慢煮嘅股份買嚟主要都係博收息兼有機會賺啲差價。
另一隻昨日造好嘅股仔係漢國置業(160) ，集團早前宣佈同控股公司出售左內地一個項目，賺左超過10億元，管理層透露七成回籠資金會用來還債及發展，咁係咪即係等如有派紅利希望呢？所以股價上衝一輪後回調，唞完氣再上左去3.96元，造高左2.9%。
五礦資源累升近倍
睇番O依家個市嘅表現，有得升但大市唔算好勁，恒指收市報23710點，升136點，升0.6%；國企指數收報10257點，漲132點，升1.3%，又係國指升多一倍。而成交金額又上908億元，資金幾壯旺，仲係中資股強勢啲。
友邦(1299) 、建行(939) 、工行(1398) 、中行(3988) 及國壽(2628) 領漲，5股股中有四隻係中字背景，合共為恒指貢獻76點升幅。由於恒指升左幾日，唔排除指數有機會回一回，但只要調整唔深，啲錢都係搵其他嘢炒。
借住油價上升，「三桶油」亦隨大市齊升，表現最好嘅中石油(857) 收升0.82%報6.17元。輪流炒就借住內地有色金屬期貨大漲，炒作本港有色金屬股，大冶有色金屬(661) 升9%報0.157元；中國多金屬(2133) 走高8.4%報0.27元；哈薩克礦業(847) 升7.7%報55.35元；中國有色礦業(1258) 乾升7.14%報1.2元；規模較大嘅五礦資源(1208) 單日升6.3%報3.2元，如果計佢累積升幅，都由低位升左接近成倍啦。
陸羽仁
金融High Tea 舊文
來源 source: http://hdfin.stheadline.com