財路：
追炒落後揀花樣年
■花樣年主打珠三角內房。 資料圖片
內房隻隻追炒落後，場內花樣年（1777），未計嚟自旗下彩生活（1778）股本增值，明年預估PB得0.43倍，仲係平，揀落後，花樣年有得諗。
花樣年主打珠三角內房，兼以打造精品高檔住宅同城市綜合體為主。集團上年全年內房銷售122
億元人仔，增加8.3%，今年頭兩個月內房銷售15.2億元人仔，同比增加26%，keep住靚仔。
據廣東省房地產行業協會數據，上年珠三角商品房銷售面積近23%，地區銷量排喺全省前九名。諗到係，花樣年主打地區內房銷售活躍，加埋本身項目value added，集團嚟緊應該有肥仔增值同利潤。
場內專業預估，花樣年今、明兩年PB得0.5倍同0.43倍；又花樣年2014年分拆主打物管嘅彩生活上市，彩生活雖則潛近上市以嚟低位，但現價比NAV凸章約3.3元，粗略計數，花樣年嚟自彩生活潛在增值近17億元，或花樣年每股約0.29元，花樣年實際PB仲抵！
花樣年喺成都、南京搞老人日間照料中心同養老公寓，又喺上年中同成實外教育有限公司簽署合作協議，成功為成都美年廣場項目引進成都外國語學校附屬小學，打造西南地區最大教育藝術綜合體。教育同養老好渴市兼食正未來大主題，花樣年湊得大，呢兩瓣一樣有分拆潛力，畀到集團肥仔增值。
花樣年2013年尾宣佈引入超級大孖沙TCL集團，現價1.25元，比當年TCL每股入股價1.41元潛水13%。現價買花樣年平過TCL。數咁計，花樣年上番TCL買入價，係咁意講緊要升15%，花樣年翻半番到1.85元計，未計彩生活增值之前明年PB都係得0.69倍，仲未去到上市以嚟平均0.83倍PB。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com