中環在線：金管局時薪$55搵學生推廣
入得金管局工作，大家可能以為人工一定好高，但原來金管局新近有份兼職，時薪只得55蚊，跟馬會、迪士尼兼職差唔多咋。不過，呢份工就算你想做，都唔係
人人做得，因呢份工係專為大學生而設嘅「電子支票推廣大使」，講明只係接受非應屆畢業嘅大學生申請。
電子支票係乜東東？其實金管局早於2015年底推電子支票，之前搵來形象入屋嘅陳豪拍條宣傳片，可惜至今未算好流行，事關市民本身要有網上銀行賬戶之餘，仲要搞一輪服務登記、申請數碼簽署等等，最重要係對方都肯用電子支票過數，香港人最怕煩，煩就咪搞㗎嘞。
商場巡迴sell電子支票
金管局當然唔會輕易放棄，打算今年4至7月去各區商場巡迴展覽sell電子支票，於是要請學生大使，負責現場協助市民玩遊戲、介紹展版、答問題之類。有興趣嘅同學仔又唔好諗住hea做呀，返工前要上堂，認識電子支票點運作。
雖然學生大使時薪只得55蚊，但可以將「金管局」三隻字寫落CV，點講都幾好睇嘅。金管局又規定，同學仔每星期最多只可以返18個鐘，以每場返6個鐘計，即係一星期最多返3日，都唔會搞到大家因為電子支票而返唔到學，有興趣就喺本月21日前上金管局網頁申請喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com