金手指：
所有資產都要減磅
■港交所行政總裁李小加
上周講過，兩周前睇利息掛勾衍生產品價格，聯儲局三月加息機會，由不足兩成突飆至加硬。12月先加過息，隔一次（每6周嘅）會議又再加，即梅花間竹咁加。如直至呢年尾都係咁，今年就會加息四次！
加四次，相信好難信。所有（包括孫柏文在內）之前覺
得聯儲局會負責任，唔會係咁全球吹大泡沫嘅人，喺呢9年來，轉軚嘅轉軚，唔轉嘅就已離場，因輸清曬。
不過加四次，唔係冇人講過，聯儲局副主席Fischer舊年尾已咁講。到𠵱家，所有資產價格都係反映啲人信最多加三次。唯一我覺得唔會加四次，就係今年加加嚇息突然發生大股災，或大型金融、政治動盪。
我只可以話，梅花間竹咁加係堅嘅，要喺未有其他人信之前閃。要即時減持所有資產，包括我以前推介過的，都要減磅。
最後，我今日想喺兩件事上全力撐李小加。首先，我好希望估價有萬億美元市值嘅沙地阿拉伯國家石油公司（Saudi Aramco）來港上市。佢一來，就算只上一成股權，都即成恒指重磅股。𠵱家話新加坡係上市地點嘅熱門喎。新加坡囉大佬！Backwater。
第二，就係花旗國ban咗比特幣ETF上市。花旗國寧信啲唔係以實貨，而係紙上期權組成嘅商品ETF，黐線。佢哋唔識貨，唔等於唔可以來港。亦畀全世界人睇，香港走在金融發展最尖端。李總！努力呀！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com