【知魚之樂】人工智能大茶飯（唐牛）（MAR 14）
2017-3-13 17:01:12
千禧年伊始，量化寛鬆加息減息乃家常便飯，當時因工作關係，經常要為息口調整後供樓負擔變化計數，還記得當時以樓價200萬元作為基準。想不到十多年後的今天，財經頭條竟然係「400萬元上車盤不足1,000
個」，認真嚇人。辣招及水浸下令樓市供求失衡，樓價嚴重扭曲，買樓為住得好啲還可以，買樓為發達？你諗都唔好諗。
樓市嚇人，股市亦不遑多讓，講緊嘅係一批科網股。美圖秀秀（01357.HK）上市時俾人睇淡，更一度失守招股價，但在北水買盤源源不絕下，最新已較招股價高出近五成，破頂股還有大大隻嘅舜宇光學（02382.HK），兩隻股市值加埋過千億，但走勢同細細粒股仔無異，利害！
今日推介二三線科網股建溢（00638.HK），一旦有資金相中，同樣可以掃到甩轆。公司主要從事電器及電子產品、摩打、資源開發及房地產發展，講概念，最殺食乃具備人工智能技術的電器產品及物聯網裝置，當中吸塵機械人已獲得中外市場顯著認知度，未來則會強攻自動化生產平台及機械人產製技能，和新一批物聯網產品。還記得總理李克強日前在兩會提到扶持多種高新產業嗎？人工智能正是其中一瓣，建溢食正條水，不得了！
建溢中期盈利狂升七成，動力正正是上述電子產品，相信盈利走勢只會越來越強，還有一個吸引之處，就係建溢中期慷慨派息0.2元，以現價計超過十厘，如果全年業績繼續咁爽手，股價肯定多一重動力。從圖表出發，股價正蓄勢突破1.5元，一旦成功闖關，下一站直撲1.8元！
#知魚之樂 #唐牛
【只要用心，人人都可以係股神！】
https://www.facebook.com/tongcow88
知魚之樂 - 唐牛 舊文
來源 source: http://www.winmoney.hk