財路：英皇證券平絕同業
■英皇證券估值遠較本地薑券商低，即使翻半番仍然十分便宜。 資料圖片
英皇證券（717）上年引資內地兩大金融巨頭，如虎添翼，而英皇證券現價比呢兩位巨頭入股價平，預測PE平絕，絕對有得諗。
英皇證券上年5月，以每股0.66元，配售3.8億股新股畀中國華融（2799），
再喺上年尾，同樣以每股0.66元，配股畀太平保險（966），呢兩家企業，都係內地金融或內險大孖沙之一。連隨配股，兩家巨頭揸英皇證券9%，曬士唔細。好正路諗，英皇證券引資兩位超級大孖沙，憑住佢哋財力同優勢，若果有策略性合作，對英皇證券喺內地發展，係無往而不利。
英皇證券現價0.64元，比起2015年港股瘋牛期兩蚊高位，累跌近70%，單係呢半年，亦累跌近30%，現價買英皇證券，比兩位大孖沙入股價仲要低！
又英皇證券家陣PB0.89倍，場內專業預估，該行今、明兩年PB0.8倍同0.7倍。同樣係本地薑券商，金利豐（1031）無專業預估PB，但現價PB1.9倍、耀才證券（1428）PB亦係講緊1.9倍，英皇證券比行家平咗53%。
英皇證券除咗證券瓣數，呢期食住港樓火紅，積極發展貸款呢瓣，喺上年度（9月底），包括孖展借款在內嘅貸款業務溢利，翻過半番到6.35億元，靚仔到痹！亦諗到，英皇證券充份把握商機，隨機應變，唔係限死孖展借貸，又食住港樓熱銷，借款業務可以喺港股勁爆前，成為該行另一個火車頭，英皇證券keep住肥仔水。
場內專業預測，英皇證券連配股攤薄反映埋，今、明兩年度EPS0.1元同0.13元，明年預測PE跌到得4.8倍，亦應該係本地薑當中，至平選擇！買英皇證券，當係咁意翻半番到0.93元，明年預測PE先得7.2倍，預估PB1.05倍，係未有耐追到上邊兩位行家。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com