金手指：中資搶地誰怕誰
■內地商人來港高價搶地，是否成為最終贏家，仍未分曉。 資料圖片
法國總統選舉，第一輪投票結果，第二輪將是女版特朗普大戰男版希拉利。冇人預會爆冷，睇歐元大反彈就知，除咗我最喜愛嘅本港陀地研究所GaveKal長老Charles Gave。佢話勒龐贏硬，起碼市場仲係
嚴重低估佢嘅勝算。
橫掂大陸中央收緊水，我又覺得Charles Gave超有point，所以股市呢排都係睇嚇算。
至於樓方面，我落筆前睇到本報訪問「最佳分析員」蔡金強，佢話香港陀地地產商老啦，所以保守；大陸嗰啲個個後生，所以進取，佢哋來港買地出價贏曬。孫柏文只可以話，受保護動物離開動物園搵食，睇嚇會點啦。陀地地產商或者因代價太大，唔想飲啲國家餵飼員嘅奶水，所以點都係冇得鬥。
個個（包括香港好多人）都話𠵱家啲陀地地產商，都係因當年英資撤、華資上所以發咗。我就覺得經得起70年代石油危機、80年代初嘅聯儲局廿厘息、中英會談、八九六四、97亞洲金融風暴、沙士、次按海嘯等遭遇，對出價同風險管理，應該係會好過啲得個升字、被嚇嚇印人仔救、「做一日英雄好過做一世烏蠅」嘅進取發展商。點都好，一日故事未到終結，一日都未知鹿死誰手。
大家（特別係填鴨式教育既得精英）成日都話：「麵粉好貴，麵包價大鑊了！」真係好離地咁唔知日日都有麵包舖執笠，因賣麵包冚唔到麵粉成本。佛利民有冇話港元會被人仔取締而消失我就唔記得，不過佢就話過通脹，永遠喺咩地方都係貨幣供應太多嘅問題。人行印錢，結果特區財政因賣地豬籠入水，我作為香港人真係多謝曬。
希望第時呢啲心中有團火嘅大陸買家，唔使同特區政府講數，爆破後要求加大地積比，之後賣發展權畀今日好老、冇活力嘅陀地地產商喇。路遙先知horse power！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com