監管風 壓股債
2017年04月25日
法國大選第一輪投票結束，極右候選人勒龐雖然第二位出線，但睇得票較少機會在最後投票勝出，法國飛唔出黑天鵝，本來外圍利好。但港股無反應周初開市，全日升升跌跌，歐股抽升拉高港股叫做升番97點收市。不過，內地股市就股債齊瀉，搞出咗個黑色星期一。
內地市場唔理外圍造好，出現一片拋風，而且力度唔細，最後滬股跌至逾三個月收市低位，黑色星期一再度上演。上證綜指最後收跌43點或1.4%，報3129點；深成指跌222點或2.2%，報10091點。
內地股市猛跌，粗粗哋可以講出兩個原因，一個係首季資金有收緊現象；二係我早前講過關於監管加強產生的憂慮。內地資金收緊，徵兆之一見諸於性質接近貨幣基金的餘額寶規模，首次突破萬億元大關。餘額寶係內地網民透過戶口集腋成裘透過放貸獲取收益的渠道，首季咁多人放錢落去，主要係資金供應緊張咗，拉高咗餘額寶的利息，以3月31日，餘額寶7日年化收益率達到3.9290厘，迫近4厘。資金成本貴咗，供應仲緊張咗，自然對投資市場有利淡作用。
首季內地銀根收緊
另一個更明顯的因素，係近期內地多項加強監管的措施接連推出，包括短短10日內，一行三會相繼表態要「加強金融監管」。中國銀監會更是在10個工作日內連發9道命令，劍指金融監管套利、委外(即委託外部投資，如委託基金管理資產)等。中國證監會和上交所均對股市操縱行為做出嚴監管表態，堅決打擊惡性操縱。中國保監會也發通知，嚴防嚴管嚴控保險市場違法違規行為，嚴防內外勾結干擾監管工作。
在監管加強之際，千億委外資金贖回潮持續擴散。券商指，包括國有大行、股份制銀行、城商行在內的各類大中小銀行都加入贖回潮。為此，最近好多委外專戶不計成本地賣出債券，結果就令中國金融市場遭遇「黑色星期一」，股市、債市、商品期貨齊齊下跌。股市挫低之餘，睇番債市都全天下跌，而且午後跌幅進一步擴大。10年期國債期貨跌0.39%，五年期跌0.27%。債價跌收息升，10年期國債收益率漲4個基點至3.51%，為2015年8月以來新高。2020年到期、票面利率3.05%的國開債現券早盤上漲4個基點至4.29%。
對於內地市況，陸羽仁月初已經話要留意監管部門嘅動向會對股市產生壓力，後市而家要睇中央點樣應對。正路嚟講，阿爺見經濟好信心大咗唔怕監管多啲，但若然市場反應太大時，又會收吓手，而家上證綜指大跌穿埋上升軌，常理估計下試到3000點有支持，所以上證跌近3000點就可考慮低吸番啲指數基金。
昨日講到有線寬頻(1097) 大比例供股轉讓控制權唔係咁正斗，佢昨日一開市微跌少少報0.7元，已是全日高位，收0.6元，差唔多最低位收市，唔見咗15.5%。成交有1億元，成隻股街貨先得3億元，一日有1億轉手，可見大量是炒即日鮮，不過昨日去玩都係輸多贏少啦。
金山軟件嫁女入豪門
大市方面，恒指收報24139，升97點；國企指數收報10107，漲57點，成交金額655億元。藍籌股騰訊(700) 再創新高，曾見240元，收升0.68%報238元；滙控(005) 升1.12%收報63元；長江基建(1038) 更漲4.1%報66元，成升幅最大藍籌。
個股較標青係金山軟件(3888) ，大升8.1%，金山公佈會向騰訊(700) 出售手遊公司西山居約4.34%股權，對價約6261.8萬美元。交易完成後，金山軟件於西山居權益將自71.99%減少至67.65%。按照呢個交易價，西山居價值係12億美元，金山攤佔約8億美元(62億港元)，以金山現時市值268億元計，單係持有西山居價值都唔少，大家憧憬係今次金山軟件嫁女入豪門，會唔會母憑女貴，所以金山軟件股價急升8%，收報21.9元。不過隻股升咗唔少再抽上近一年高位，炒作要睇位食。
陸羽仁
金融High Tea 舊文
來源 source: http://hdfin.stheadline.com