大棋局：法國左走？右走？
■主流傳媒一致話馬克龍會贏，但即使他最終勝出，亦不代表歐洲前途光明。 資料圖片
自戴高樂開創第五共和以來，法國已經五十年冇試過兩大執政黨連第二輪總統選舉都入唔到。法國政黨雖然經常改組換名，半個世紀以來總離不開左翼社會黨同右翼共和黨。剛過去
嘅總統第一輪選舉，兩大黨被淘汰，有重大影響力的人物亦出局，反而冇選舉經驗嘅馬克龍最高票勝出第一輪投票。
馬克龍自稱中間派，其實中間偏左。只有39歲嘅佢，2008年已成為羅斯柴爾德‧希爾銀行合夥人；2014年，成為法國經濟、工業同數字經濟部長；2016年成立「前進」運動。馬克龍雖然唔似特朗普或柯文哲屬政治素人，卻無疑係眾多參選人中擁有最新鮮的面孔。
另一位勝出第一輪投票的，即一直被外屆稱呼為女版特朗普的勒龐。勒龐一出場就代表極右，要法國退出歐盟，要法國用番法郎，要法國人優先。外界一直驚，倘若最後由佢勝出總統選舉，法國會跟隨英國脫歐，歐盟能否存在成疑問。
歐元係世界第二大貨幣，歐元前途不明朗，意味中短期內美元再無任何對手，美元會獨大。石油、貴金屬乃至各類證券資產，想脫離美元計價或美元定錨計價模式唔使諗，就算發現美元有何種問題，你都要焗住用。所以當馬克龍最高票勝出第一輪投票時，歐元轉強，美滙指數一度跌穿99，因為馬克龍政綱認為需要維繫歐盟之存在。
同特朗普初選勝出時相似，主流傳媒一致話馬克龍會贏，勒龐最後輸硬。法國政壇從左翼到右翼，呼籲一齊阻止極右翼勝選。第一輪投票，馬克龍得票23.8%，勒龐21.5%，其實非常接近。最後若勒龐勝選，對歐元乃至歐盟係一個衝擊，馬克龍勝選卻不代表歐洲前途光明，最多係維持現狀。所以歐元上升有限，向下倒有大空間。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com