【大茶飯】王國不應和王者隻揪（青冰）
暑假差不多完結，對於學生哥黎講，應該要收拾心情番學喇，而作為遊戲公司，呢段時間開始將會係淡季，但之前兩個月暑假，大家應該喪玩啦，如果唔係，阿爺點會事先在暑假開始之前，發文打壓王者榮譽呢，就係怕你地玩得太癲嘛。
IGG(0799)昨天公佈上半年業績，純利
增兩倍，賺近六億港元，有跟開手遊的戰友來說，應該不太吃驚，而佢嘅股價今年曾經升過1.8倍，純利有此增幅都係理所當然。青冰不只一次讚IGG財務穩健，業務容易理解，冇乜整古做怪的空間，今次派息續慷慨，普通股息加特別息，加埋都0.35，以手遊公司來說，份業績係交足功課。
在去年底，佢地只有三分一收入來自亞洲，而剛剛呢份業績就顯示，亞洲佔收入一半了，好大程度上，係王國紀元在內地掂，令比重急升。呢個強勁數據可能係引來騰訊(0700)進軍策略遊戲的原因，「亂世王者」早兩星期上架，由於阿媽太強，相信對IGG的王國紀元有一定影響，所以近期股價向下，亦屬正路，但由於遊戲界開始進入淡季，兩者真正交鋒，應該要在年尾先有端倪。
本港上市的手遊公司，IGG肯定是最四平八穩的，金山軟件(3888)有8億收入來自遊戲，基本上係撐起其他唔掂的分部，但現時預測市盈率仲係19倍，所以出完業績連隊幾日，不無道理；至於雲遊(0484)呢一堆的公司，坦白講係唔入流。所以IGG在未來的挑戰，應該係如何應付霸主騰訊。
青冰愚見認為，IGG應該重點開拓其他亞洲市場，若花錢在內地同老大隻揪，並不化算，人地有平台有錢有阿爺，點計都係唔著數。IGG的王國紀元勝在全球同服，係民族情仇最好發洩的場所，內地油王(打機喪課金個啲人呀)有其他鄰近國家俾佢打，肯定仲開心啦，呢個亦係騰訊暫時未做得到的，而且，花多點資源發展其他地區，話唔定有日騰訊覺得打你不如買你呢。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com