笑到最後：信趨勢亦可等運到
■新品牌Voltron開始為彩星玩具業績帶來貢獻。 互聯網圖片
彩星玩具（869）公佈中期業績，純利3659.1萬元，按年倒退62%。每股派息0.03元，相對舊年0.05元減少，但另一層面則係接近100%派息比率。公司現金繼續有超過10億元，近乎冇負債，連
同股票物業及6.5億元殼價，公司每股值1.42元。
中期純利倒退，但係業績講明「新品牌『Voltron』及『Ben10』已開始為彩星玩具業績帶來貢獻，並預期下半年度將擴大分銷。」即係業績將會向好，已經打開口牌。以本欄11月21日推介開市價1.23元計，截至周五收1.34元，連同0.05元末期息，至今升13%。經驗話畀我知，一間公司有業績憧憬，現金資產強，公司不停回購，只要有耐性，價值終會被市場反映。中間過程及走勢可能未必完全反映基本因素，但股票潛力同價值將會浮現，所以目標價繼續睇2元。
彩星玩具現市值16億元，屬於細價股。今年細價股氣氛無可避免受粉塵爆破影響，加上藍籌股狂升，淨係買盈富基金（2800）今年都升近3成，機會成本較大，買其他股份例如高明呢隻推介，都跑輸大市。
身邊有好多朋友都係趨勢投資者，同上述買股嘅方法，好多時候會同高明得出相反嘅結論。趨勢投資者直言，對隻股票嘅整個升勢毫無興趣，只係對一隻股份升得最快嘅一段，即係大概三日至一星期嘅升勢有意跟進。呢種炒法好處係快出快入，淨係食成個升浪最快嘅一段；壞處係技術含量高，的確有高手把握到入市出市時機，但把握唔到嘅更多，而且遇上今年股市升勢，出出入入未必賺得多過長坐。
高明覺得無話邊種炒法啱定錯，即使係價值投資之父格拉咸，佢亦都講過可以拎一部份資金純粹投機，當然前題係要用一個完全獨立封閉嘅倉，以免原先諗住長坐嘅股份「受感染」而當短炒貨沽出。一部份資金用嚟跟趨勢，確保個人貼市；但另一部份則應不動如山。兩者喺方法上完全矛盾，但上如果能夠分隔開兩個倉，兩種炒法應該可以並存。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com