中環在線：
國泰帶隊法國聽亞青管弦樂團
■龐信上周喺法國鬼馬指揮AYO表演。
聽交響樂本為賞心樂事，國泰（293）上周帶一班傳媒遠赴法國參觀第18架A350-900客機，同時邀請大家入場欣賞贊助多年嘅亞洲青年管弦樂團（AYO）表演。指揮龐信（Richard Pontzious）經驗
老到，完成兩首指定樂曲後，最後徇眾要求encore，豈料佢鬼馬地走入樂手席，成首歌唔使指揮順暢完成，短短數月練得如此默契，難求！
演奏廳設於法國航空業重鎮圖盧茲嘅空中巴士大學，別有一番風味。亞洲青年管弦樂團享負盛名，指揮兼藝術總監龐信於1987年同小提琴家曼紐因一同創辦。
指揮龐信「搞破壞」
樂手每年選拔一次，來自亞洲各國，今年共有109名團員，台灣人數最多，有31人；香港唔輸蝕，排第二，23人獲選；其餘樂手則來自內地、日本、韓國、印尼、馬來西亞、新加坡等11個地區，平均21至22歲。齊聚集訓數星期，即展開世界巡迴表演兩個多月。
兩首指定樂曲理查．施特勞斯的《唐璜》和貝多芬《第七號交響曲》演奏細膩，令人驚喜嘅係，encore環節竟為港人熟悉嘅《威廉．泰爾序曲》第四樂章，即賽馬必播歌曲。龐信帶領觀眾拍手打拍子後，即走入樂手中間，跑去與大家握手，打斷其演奏，最後索性坐在小提琴手旁邊，甚至將佢個樂譜反轉擺，引得哄堂大笑。直到最後，樂曲喺沒有指揮情況下順利奏完，掌聲如雷。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com