財路：莊士有point博開波
■莊士呢幾年資產值水漲船高，到今年3月尾，股東權益近百億元。 資料圖片
本地薑龍頭地產股又再辣起，二線莊士機構（367）啱凸頭，食住呢潮香江地產升浪，莊士揸住嘅超靚仔項目，一樣有肥仔增值，博莊士開波，買。
啱上周五，本地龍頭地產股，好似恒地（012）、新地（016
）同新世界（017），全部大陽燭收市，齊齊創一年新高。莊士6月以嚟一路盤整，水向下流，資金炒落後，莊士已經有point。莊士除咗揸住中環莊士大廈、尖咀莊士倫敦廣場，對上日子，集團亦密密增加土儲，包括山頂歌賦山道15號、香島道，同寶珊道28號、30號屋（揸50%權益），全部喺超靚仔地段。
莊士識得揀，呢幾年資產值水漲船高，到今年3月尾，集團股東權益上到近百億元，又以家陣NAV5.84元計，莊士現價1.78元，PB得0.3倍！場內其他本地薑，嘉華國際（173）PB0.47倍、資策（497）0.37倍，麗展（488）0.35倍，莊士PB仍然叫平。
仲未止。莊士揸住資產，唔係擺喺度唔鬱，除咗啱啱過去嘅年度，集團透過旗下莊中（298）揸東莞物業，以15億元沽售，項目總體大賺過10億元，莊士上邊本身揸住歌賦山道項目，就成功以21億元出售，當中，有80%係以現金支付，又項目以每方呎金額計，創香港新高。呢壇製作，預計今年第三季搞掂，兼為莊士帶嚟7億元淨收益。睇到係，莊士享受資產升值同時，識得善價而沽，物業增值同變現，變得好實在！
呢轉買莊士，博跟龍頭爆穿1年高位兩蚊，又以上邊幾位行家平均約0.4倍PB做目標，莊士都講緊要升三成，到2.33元。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com