怕音樂停就唔好入市
2017年09月26日
美國總統特朗普同北韓「火箭人」金正恩過招，加上中央再出招，二線城市買樓限購、限售或限貸，令內房股大力調整，經紀張形容為「內房股小股災」，個市乘機震倉，以接近全日低位收市。
港股早前上左兩萬八關嘅阻力唔細，衝左上去都企唔穩，連接兩日調整，
噚日跌得仲甘，一度失守50天線，最多跌404點，低見27476，恒指收報27500，急挫380點。國企指數收報10912，下滑196點，成交金額1110億元。藍籌中騰訊(700) 跌1.3%報341.6元；建行(939) 跌1.7%報6.51元；工行(1398) 跌2.2%報5.71元；三者合共拖低恒指108點。另外港交所(388) 跌近2%報211.2元；神華(1088) 跌3.3%報18.28元。
上周癲炒嘅內房股，借住長沙、西安、重慶等八個城市推出調控樓市措拖顯著調整，連屬藍籌股嘅中海外(688) 都唔例外，跌6.8%報25.45元；華潤置地(1109) 跌7%報23.75元，為跌幅最大藍籌股。早前獲資金追捧嘅恒大(3333) 跌8.8%報26.9元。早前熱炒嘅二三線內房股調整仲急勁，奧園(3883) 急瀉19%報4.19元；新城發展(1030) 挫18%報3.63元；佳兆業(1638) 跌16%報5.6元，震到高追炒家唔清唔楚。
手機股仲未值得撈貨
經紀張跟風買左內房，微少利潤一日吹走晒，驚到面都青。我話內房股累積升幅驚人，個別由年初到o依家升左以倍計，升得急跌得快應該預左，所以跟風短炒要預定止蝕就係咁解。
大市上到28000點，入得去玩，預左係炒，要有炒嘅策略，第一唔好瞓身，否則好易瞓低，借孖展更難搞，但你用碎紙炒股就無壞。第二明知係博，例如用10%博10%，甚至20%博20%，都係要有止蝕位，咁就唔會total loss。音樂椅唔知幾時完，內房再插深少少反彈唔奇，但你o依家入，要知道萬一音樂真係停，內房一直踩落去向下插，你都唔會跳樓先好去玩，否則唔好入市。
另一個調整大啲嘅板塊係手機設備股，iPhone 8上市反應未如理想，市傳蘋果暫緩零件定單出貨，手機設備股有理由回調，瑞聲(2018) 收跌6.7%報127.5元；舜宇(2382) 跌5.7%報收123.8元；高偉電子(1415) 跌9%報3.29元；丘鈦科技(1478) 跌3%報13.36元。基本上呢排都唔建議買手機設備股，佢o依家回得唔多，繼續唔建議大家撈貨。
代理股難睇好
上個禮拜美國聯邦儲備局宣佈縮表，股市樓市反應唔大，周日新盤推出銷情都仲理想。不過地產代理界施老闆，似乎就對樓市前景有啲擔心。早幾個月施老闆先至公開話自己改變左對樓市睇法，由淡友轉左做好友，呢兩日佢就跳出嚟話，o依家政府想推首置上車盤，擔心會搶走新盤九成嘅客。施老闆語出驚人，搞到有中環茶友忍唔住問，呢個講法係講真抑或講假？發展商係咪好擔心政府出招搶客？
特首林鄭月娥出招，要同發展商合作，必然要先過佢哋O個關，但地產代理議價能力就弱啲，因為喺呢個政策上，代理基本上係無角色，而且仲有可能被替代。
近年地產代理生意唔易做，呢樣可以喺上左市嘅美聯物業(1200) 業績反映，過去五年美聯有三年賺錢兩年蝕本，平均計只係微利。其實近年好多老闆同高層，都明白做中介人生意好唔穩定，佢地賺埋一大O舊後，個個都走去投資買樓，o依家投資呢瓣先至係真正嘅肥豬肉。
上半年本地樓市火熱，賣樓金額創左新高，帶挈美聯賺左1.16億元，遠勝去年同期虧損為1.34億元，不過公司宣佈唔派息。如果以佢上半年業績計，目前市值16億元應該好抵買，不過公司股價喺業績公佈後不升反跌，由高位2.5元慢慢回落到噚日嘅2.24元。地產代理生意同樓市交投直接掛鈎之餘，仲同佢地嘅訂價政策有關。
如果發展商想賣貴樓，訂價貴過市場，咁就會俾高佣借助代理催谷。可以想像，如果將來發展商同政府合作推出上車盤，訂價自然唔可以貴，亦唔怕冇人買，好似以前政府同私人發展商合作起居屋，根本唔使搵代理吸客，所以如果首置上車盤大行其道，第一個直接受害嘅就係代理，所以代理股好難睇好。
陸羽仁
金融High Tea 舊文
來源 source: http://hdfin.stheadline.com