中環在線：
一田開年 CEO海嘯式撲清酒
■黃思麗（中）同員工使勁撲清酒桶，務求令清酒濺得有咁高得咁高。李潤芳攝
噚日係元旦日，日式百貨一田當然唔少得日本傳統新年慶祝儀式。一田行政總裁黃思麗帶領同事喺荃灣廣場一田進行「撲清酒」儀式，即係以木槌敲擊酒桶。由於清酒係敲擊後濺得越高，代表生
意越好，黃思麗當然起勢咁撲落去，令現場炸到水花四起，整濕曬自己都冇有怕，仲話「今次仲唔旺到不得了！」
除咗撲清酒外，當然亦唔少得福袋同年糕等日本應節產品，黃思麗亦有當場打年糕，雖然個木槌唔輕，但佢亦打得有板有眼，相當有架勢。在場唔少人都有落場拎起木槌試打一番。
加推美少女戰士福袋
另外，一田喺上年11月尾搞購物優惠日時，推出嘅美少女戰士水手服好快就俾大家搶購一空。由於反應唔錯，一田賣嘅新春福袋，都臨時加咗美少女戰士福袋，畀多次機會大家儲齊。
事實上，想儲齊一套水手服真係有需要一早排隊，因為今次準備嘅水手服福袋有限。曾經係唔少人兒時夢中女神嘅水野亞美，所代表嘅粉藍色水手服，每間店都只有20套，只有沙田、荃灣、大埔3間店有售。黃思麗預計有關福袋好快會賣曬，而且都唔係為賺錢，而係想攞個好意頭同令顧客開心。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com