金手指：金管局何時逼加P
■呢幾個禮拜，一個月長嘅H已經係咁升。資料圖片
過去一年，孫柏文講過好幾次話樓市「加息十次都唔怕」。原因係好多人借錢買樓，都有預算。而就算係用同聯儲局息口走勢敏感度極高嘅H（即HIBOR「銀行同業拆息」）掛鈎按揭，借錢人都會有個用P（即Prime「最優惠利率」
）計嘅封頂息率，即除非P升，否則啲借咗錢嘅人都仲有預算。咁點解「加息十次都唔怕」？原因係睇對上一次加息周期，聯儲局由1厘加到2.5厘時，P突然係咁加。而以今次由零厘起錶，每次加0.25厘，要加到第十一次就出大鑊事。
當然，係咪花旗國加十次息，香港P先升？絕對唔係金科玉律。不過，如果我係金管局，政策上會開始逼啲銀行加P。原因係上次加息周期，樓價低𠵱家好多。而喺97至03嗰轉，金管局學到嘅最大教訓就係銀行資產負債表要健康。一旦銀行自己借錢成本升，即銀行同業拆錢利息升，不過收客嘅錢被P唔鬱而封頂，壓力會增加。
呢幾個禮拜，一個月長嘅H已經係咁升。同上次加息周期比，唔使去到2.5厘個H已鬱。我諗其中一個原因，係上次加息周期，啱啱發生喺香港經濟大幅減肥、去咗啲債局泡沫毒後。全球投資者對香港銀行系統非常有信心，因之前咁都死唔去。不過今次香港樓價喺太空位咁高，資金流向會更敏感。H鬱得快，咁P被迫升又會等幾耐呢？
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com