2018炒住先
2018年01月02日
2017的股市整體不算很狂，但科技股比較狂，樓價十分狂，比特幣超級狂，問題是2018還會繼續瘋狂嗎？
恒指2017年全年升了36%，是2009年以來最大升市，國指去年升了24.6%。在各行業中，資訊科技股升92.3%，是各行業之冠。
反映
大型屋。苑二手住宅樓市走勢的中原城市領先指數(CCL)年末升至165.62的歷史高位，全年埋單大漲13.2%，幅度為近5年最大。不過大家都知呢個指數唔反映新樓的瘋狂程度，北角海景盤造到58000元一呎，呢啲先叫做狂，如以新樓最高價計，個別真係一倍咁升。問題係二手樓難做按揭，好多人上車焗買貴價新盤。
論癲狂，樓又點都唔夠比特幣癲，比特幣價格今年中才首度升穿3000美元，年底已一度升近2萬美元，年尾回到13760美元，但全年計仍累升13倍！
在鬥癲的時代，你唔夠勇就搵唔到大錢，若你屬於此類，畀兩個角度你做阿Q自我安慰一下，第一係︰「一日唔沽一日都唔係贏呀！」去年年頭買左翠如BB股聯旺(8217) 夠發囉，O依家咪又係得番啲渣。所以未埋單計數離場兼且真係唔再入場，一日都未係真贏。
無發達因為無冒險啫！
第二，人哋賺到錢係冒風險的成果，你無賺其實唔使擔驚受怕。好似北角樓王咁，若然有人咁勇搵財務借二按畀10幾厘息入場，58000元一呎入市，三年後升到88000萬元一呎(提提大家呢個係舉例，唔係對樓價的預測)，升五成幾，人哋賺錢你唔好恨呀，你無冒險呀嘛。要冒險日日都可以入場，唔使買樓咁慢，買比特幣快呀，你現在買，若佢再升穿2萬美元時，已可以賺近五成啦(又要記住呢個也不是買比特幣的建議)，發達定仆低，可能等三星期就知，唔使買樓等三年咁耐啦。(講三年因為要避交超高的短期交易印花稅)若果你決定唔冒險，咁都無法啦，呢個係「富貴險中求」的遊戲，當然玩不好，是會由「富貴」變成「冚家富貴」的。
阿Q時間結束後，可以睇睇市場的真相，關鍵還是水多。全球四大央行，美國、歐洲、中國、日本，美國大部份仍在開水喉。美國叫做慢慢回收QE資金和慢慢加息，美國由去年10月開始每月縮表回收100億美元，幅度極少。另外，自2015年12月開始加息，由於加得慢，香港到今天還未需要跟佢加息。歐洲和日本央行還在QE放水，中國央行叫做放慢增加信貸速度，M2增長跌到10%以下，卻仍高於GDP名義增長，水頭仍足。
水頭仍足 泡沫未爆
全球資金氾濫，可供投資的資產增長速度，追不上金錢加印的速度，錢多貨少，資產價格就會上升，一係升實質供應有限的東西如大城市的房地產，一係升有概念想像空間大的東西，例如炒可以大幅侵蝕傳統行業利潤的科技股，又或者炒好似可能取代貨幣的比特幣(我話「好似可能」，你都知我對呢個概念有幾懷疑啦！)
話明係炒，即係有泡沫，所謂泡沫就無謂估頂啦，比特幣可以升到4萬美元，也可以跌到4000美元，好難估泡沫在那一刻被刺破。
一眾中環茶友講起爆泡問題，話2018會否是爆泡之年呢？斷估無痛苦，泡沫爆破，不由香港本地因素導致，本地因素會令價格起伏，較難剌破這個環球巨型泡沫，最有可能出現的刺針，還是高漲的利息，而且是伴隨通脹而生。如今環球通脹還在2%以下的較低水平，所以還有一些時日「安全」，到通脹升勢轉急，利息加速上行時，危機就會出現。所以結論係︰「可以炒住先」。
唔好講咁宏大，集中講香港股市，睇番2017年股市實際情況，會有的啟示。2017年全年恒指升36%，收29919點，很近11月造出的全年高位30003點，恒指可以話在高位收爐。
吉利、碧桂園、舜宇佔三甲
恒指由50隻股組成，當中45隻於2017年錄得正回報。頭三位是第一吉利汽車(175) 升266%，第二碧桂園(2007) 升243%，第三舜宇光學科技(2382) 升194%，它們是恒指成份股當中表現最好的股票，股票騰訊(700) 升114%只係排第四。內地去年汽車消費不俗，吉利做得好好；碧桂園就長期落後，升上售樓一哥之後，股價急起直追；舜宇光學食到蘋果概念，業績靚仔。
花無百日紅，去年的股王，今年未必能繼續，我對舜宇光學的憂慮大少少，智能手機換機潮進入飽和期，非獨蘋果的問題，高增長的峰值可能已過，下一個高潮要等5G到來，小心相關股份的一波回頭浪仲未完。
在恒指升幅高達36%之下，5隻股全年見紅，倒數第五是太古A(019) 跌2.3%，第四是電能(006) 跌3.5%，倒數第三是中移動(941) 跌3.6%，倒數第二是中石油(857) 跌5.7%，倒數第一是聯想(992) 跌6.2%。
總的來說，在全球股市熱炒之中，公用股如電訊、收租股、收息股都麻麻，炒都唔炒公用股，唔止香港，美國也如此，電訊股全年表現最差。太古A又係收租股，又俾個仔國泰(297) 拖累，收72.35元，接近全年低位71.85元收市。
聯想成份股位置有危機
排尾二的中石油受油價低迷業績差影響，上半年急插，7月低位4.639元，不過下半年油價回升，收5.45元，已比低位升番14.9%，在康復之中，照走勢可能可以再反彈一段，等候油價見頂。
咁多隻之中最差其實係聯想而唔係太古A，聯想收4.41元，接近低位4.1元，12月中後段炒吓反彈，佢阿媽聯想控股有紫光入股又炒起，帶動少少氣氛，但整體感覺不良好。聯想11月時公佈截至9月底止中期業績，純利大跌80%至6700萬美元。後來聯想公佈以最多21億港元購入富士通旗下的個人電腦品牌Fujitsu 51%的股權，令聯想成為日本市場最大的公司。
撇開聯想的個別投資，它已是全球個人電腦市場的一哥，問題是環球趨勢是以手機等移動工具上網，如今美國用移動端上網接近九成，好多新潮網站甚至放棄個人電腦的介面設計，直接把移動介面放到個人電腦版面上，個人電腦變成愈來愈可有可無。聯想在一個夕陽行業做一哥，真係好難睇好，佢市值529億，其餘排尾五位的股票隻隻都大過佢，股東真係要小心佢今年會被踢出局。
另外，國指三大高回報股份第一係平保(2318) ，升110%，第二係廣汽(2238) ，升97%，第三係國航(753) ，升92%。
金融回暖 能源追落後
如果睇不同行業，2016年有表現的三大行業資訊科技業、原材料業和能源業，去到2017年，資訊科技業繼續好得，有92.3%回報，高到得人驚，只係騰訊(700) 和一眾蘋果概念股都炒到癲。未來都係科技世界，我比較睇好AI(人工智能)股，可惜無乜邊隻AI好股來香港上市，我地得個睇字。
另外2016年有表現的原材料股，2017年其實都好好，有30.5%回報，連升兩年唔容易，呢個行業受惠中國經濟復甦都算連好了兩年，能源業去年回報11.4%明顯差過大市。今年能源股會否跑番贏材料股，追番少少落後呢？另外我比較睇好是2017年升了30.2%的金融業，預計在利息慢慢上時會繼續做好，而利息上升繼續不利電訊股和公用股。
另外講兩句細股，恒生大型股於2017年上漲40.3%，中型股升33.5%，小型股升19.2%。大家唔好忘記，在證監出招下，今年唔少小型炒股出事，一拉平均數，由於有些股份大跌，令小型股只升19.2%。2018年細股繼續難炒，曹貴子手下有20、30隻細股，如今中晒招，其他莊家都避吓風頭先，小型股炒唔過也。
陸羽仁
金融High Tea 舊文
來源 source: http://hdfin.stheadline.com