大棋局：中國撼動石油美元
■中國搞石油期貨，目的是要全世界用人民幣。資料圖片
久聞樓梯響的中國石油期貨，多個消息指將於今年1月18日上市。有一個概念我哋要先明白，近百年金融發展說明一個原理，期貨價格可以影響現貨價格。誰掌握期貨，誰就掌握定價權。
商場上你買貨量夠大，
可以同對方傾價錢。2017年上半年，中國原油進口量超越美國成為世界第一，但石油係賣家市場，石油賣乜嘢價中國從來話唔到事。中國推石油期貨，就係想扭轉此局面。
定價權有兩隻，一個係實物供需定價權，中東國家減產可推升油價，增產可推跌油價。實物供需定價權有其限制，首先你要有貨，即你要係產油國，而且產油量足夠影響國際市場。另一個係金融期貨定價權，限制少好多，唔需要有貨已可以做。
金融期貨，講白啲像外圍賽馬，要搞一檔正規賽馬成本極高，外圍賽馬賭人哋現成賽事，賭人哋嘅貨，成本就極低。
金融期貨定價權往往會淩駕於實物供需定價權，由於實物供需最終有限，而金融期貨像賭白頭片，可以無限。典型如黃金，黃金之所以有價值，因為佢存量非常少。然而存量太少，就意味其能夠盛載嘅資金池有限。金融期貨唔同，篤嚇手指就可以，理論上無限，故期貨及衍生產品的資金池最終會超過現貨。資金池夠大，其價位上落的影響力就會蓋過現貨價。
要全世界用人民幣
其次，由於原油生產國需要做期貨對沖，期貨的contango或backwardation會反過來影響產油國增產或減產。期貨價格也直接影響現貨價格，例如出現contango時，也就是期貨價高過現貨價，會吸引投機者入場做Cash-and-Carry Arbitrage，即正向套戥，沽期貨，買現貨；如處於backwardation時期，則做Reverse Cash-and-Carry Arbitrage，反向套戥，沽現貨，買期貨。
每個賭場都有所屬籌碼，入葡京唔通拎威尼斯人籌碼入去？中國搞石油期貨，目的就係要全世界嚟賭嘅友仔用人民幣。70年代美國以外交手段成功令中東國家賣油只收美元，全世界都要石油，所以全世界都要美元，令本來要變廁紙的美元變成搶手貨。中國正在模仿美國，每一個動作都要你養成用人民幣的習慣。但過去只要有國家唔想用美元結算石油，唔知點解都冇咩好下場。中國唔同，今日中國夠大夠疊水，結果何如？
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com