中環在線：範鴻齡全面復出 任新地獨董
新鴻基地產（016）越來越多猛人坐鎮！新地獨董陣容一向粒粒皆星，已有王于漸、利豐馮國綸、賓架梁高美懿等等，新近請埋有「公職王」（過去式）之稱嘅範鴻齡（圖）做獨董㖭。
69歲嘅範鴻齡以往身兼多項公職，因捲入中信泰富2008年炒燶外匯槓桿式合約一案
，辭去所有公職。舊年4月範鴻齡等人獲判無罪，範鴻齡終於可以重出江湖，舊年10月先獲委任為政府成立嘅「檢討自資專上教育專責小組」成員之一，之後再獲香港興業（480）委任為獨立非執董，家陣做埋新地獨董，有全面復出之勢喎。
有趣嘅係，範鴻齡身家豐厚，估計一定有投資股票，新地如此一隻優質藍籌，佢竟然一股都冇！不過唔緊要，最重要係新地大股東郭氏第三代以後可以有事請教佢。
郭基煇業績會企硬講廣東話
講起郭氏第三代，新地噚日業績會有段小插曲，話說有內地記者不停問集團內地業務，第三代、執董郭基煇（Adam）喺答之前，有禮貌講聲，指場內香港記者多，問對方「用廣東話答，好唔好？」點知嗰位記者大叫：「用中文！」好彩郭公子都冇被兇到，仲企硬堅持用廣東話答，華華突然覺得，原來識堅持嘅男人真係特別Man。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com