收市閒情：真正的習帝概念股
■習近平擬修憲，令任期無上限。真正的「習帝概念股」一定係生物科技股！資料圖片
習近平擬修憲，令習帝可以千秋萬載，任期無上限。消息一出，話知袁世凱返生、帝制復辟，炒咗概念股，賺個發財錢，狗年先有新希望㗎嘛！
好啦，港股呢邊，吉利（175）即日炒起，都算合理
，話曬習近平同李書福Friend就人所共知；北望神州，習帝概念股竟然係雄帝科技、威帝電子，周一收市分別升7%及半成，點解？媽啊！純粹有個「帝」字；仲有一隻呀，叫「煌上煌」，業務係咩？係做滷雞腳嘅，最多升逾6%！傻的嗎？
即係咁，中國有一大班咁「高質素」嘅大媽，帝制復辟恐怕都係天命所歸，不過實在，佢哋炒股捉錯用神，目光唔夠遠，要炒就一定係炒生物科技股，原因有二：
第一，習帝年過花甲之年，中國人口平均壽命先係76歲，𠵱家習帝大大話話都64歲，如果得十年多啲，你話邊夠玩？更何況，佢可能想親眼見證《中英聯合聲明》Gameover呢？要去到2047年，佢起碼要多30年命，到時佢94歲耶！
眼見江山未有才人出，世界冇咗自己唔掂，你話習帝又於心何忍？唔怕呀！古有秦始皇煉丹求長生不老，今有頂級生物科技助延年益壽！相信未來生物科技公司將會有更多資源，研發長生不老靈丹妙藥，咁習帝真真正正做到吾王萬歲萬歲萬萬歲。
第二，習帝貴為一國之君，為江山社禝、黎民百姓嘅福祉著想，當然唔會將所有蛋放喺一個籃，梗有Plan B嘅！如果長生不老藥開發唔到，身體衰老點算好？不要怕，中國科技一日N里，騰訊（700）、阿里應該好快就研發出「意識上傳」技術，將習帝腦入面所有內容Upload去Server，然後是但搵個真人又好，機械人又好，高速打包下載返習帝個Zip Folder，WOW！唔使幾分鐘，習帝重生了，唔單止後生咗，仲靚仔咗，人都精靈咗呀！呢個軀體玩殘咗，咪搵個新囉！習帝千秋萬世，永垂不朽呀！唯一擔心係，淘寶應該會有習帝意識folder老翻可以download，咁就真係習總一地都係了。
習帝如斯憂國憂民，生物科技係咪有得諗先？
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com