Money Walker：貫徹小政府大市場
■政府既然無力回應真正民生訴求，現兜兜地還富於民，反而係真正貫徹小政府大市場嘅做法。資料圖片
人越大就越明白象牙塔理論不適用於現實。
多年前讀書時有大學教授講過，庫房收入應該投放於基建及教育，原因係兩個範疇都有助推動長期經
濟與社會發展，繼而為庫房帶來更多收入，所以基建與教育喺公共開支上屬優先事項，民生福利則應該排於之後位置。
不過多年來納稅人稅款被投放到與日常生活無甚直接關係且不斷超支嘅大型基建，反觀具民生逼切性嘅中小型基建項目，例如連接新市鎮與市區嘅道路或鐵路，卻一拖再拖。至於投資教育應該無人反對，問題係本港教育方向出錯多年，單係學童與教師壓力越來越大，已反映政府多年來加大開支，未能對應學生及學校真正需要。
傳統經濟學理論話全民派錢會加劇通脹，而且部份市民有機會選擇儲起呢筆意外之財甚至用作外地旅行，因此派錢遠不及政府利用稅款作長遠規劃，於各項民生範疇加強資源來得具經濟效益。可惜為官者由交通、教育、醫療、勞福、科技、安老、殯葬等項，都未能真正回應社會需要，基建及教育嘅投資又千瘡百孔兼有利益輸送之虞，被部份學者描寫為下策嘅派錢之舉，似乎唔係真係咁不濟。畢竟當小市民連呢刻生活都未搞掂，話用庫房收入投資香港未來，真係何其離地。
執筆之時傳財政預算案會向貧困學生派錢並調高免稅額上限，筆者認為兩項措施可收貨，亦避免到富者與貧者受惠派糖程度相同嘅尷尬。既然政府無力亦無法回應真正民生訴求，現兜兜地還富於民，讓自由市場發揮力量，反而係真正貫徹小政府大市場嘅做法。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com