Money Walker：利率正常化非壞事
■外國資金進入本港後總有離開嘅一日，問題只係步伐快慢及是否有序。資料圖片
源於量寬與低息嘅氾濫資金，所堆砌出來嘅資產市場榮境，持續時間長達十年，可謂超乎想像地耐。美國早於2015年12月開始加息，意味港息已經滯後美國超過兩
年之多，而呢段港息正常化嘅滯後時間，亦已遠較市場之前主流預測來得長。
外國資金進入本港後總有離開一日，問題只係步伐快慢及是否有序，同埋市場消化能力如何，尤其是本港息口變化，須被動地視乎銀行體系結餘水平。倘走資速度太快，熱錢驟減下港息以過快速度上升，如每次加息幅度為0.5厘而非0.25厘，即使加息後息口仍維持喺歷史上相對較低水平，都可以好影響本地股樓投資氣氛。
雖有分析寄望北水可長期救駕，抵銷外資從本港流走之影響，但筆者認為有關預期不切實際。先不論北水規模有冇外資咁多，亦唔好講中央是否容許資金持續大舉南下，單係本港拆息上升不利港股投資氣氛，已經足以窒礙北水南下港股市場。更唔好彩嘅係，目前正值係特朗普為爭取中期選舉選票而動作多多嘅時期，環球風險意欲一般之下，北水南下誘因更低。
當新界上車盤已升價至600萬，一般打工仔上車機會更為渺茫，又當新股超購王頻生下，越來越多股壇新手加入抽新股行列，筆者認為於一切失控前，讓流動性與利率正常化，並非壞事。畢竟史上眾多經濟與股市危機，都離不開過度借貸、流動性氾濫，以及異常熱切嘅投資情緒。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com